Իրանի Իսլամական Հանրապետությունը կարող է քննարկել միջուկային ոլորտում իր գործունեության մի մասից հրաժարվելու հնարավորությունը՝ պատժամիջոցները չեղյալ հայտարարելու դիմաց, և «վեցյակը» համաձայն է բանակցությունների շրջանակում գործել համապատասխան այդ սկզբունքի: Այս մասին հայտնում է Associated Press-ը՝ հղում անելով Իրանի փոխարտգործնախարար Սայիդ Աբաս Արաքչիին:
Հիշեցնենք, որ նոյեմբերի 7-8-ին Ժնևում անցկացվում է Իրանի և միջազգային միջնորդների «վեցյակի» (Ռուսաստան, ԱՄՆ, Չինաստան, Ֆրանսիա, Մեծ Բրիտանիա, Գերմանիա) բանակցությունների հերթական ռաունդը իրանական միջուկային ծրագրի վերաբերյալ:
«Այսօր «վեցյակը» պարզ ասել է, որ ընդունում է Իրանի առաջարկած գործողությունների սխեման (Իրանի գործունեության սահմանափակումը Արևմուտքի պատժամիջոցների հանման դեպքում-1in.am)»,- ասել է Արաքչին, ով զբաղվում է բանակցությունների տեխնիկական մասին առնչվող հարցերով:
Ավելի վաղ Արաքչին հայտարարել էր, որ բոլոր պատժամիջոցները հանելու դեպքում Թեհրանը կարող է քննարկել ԱԷՄԳ-ի հետ երաշխիքների մասին հավելյալ արձանագրության ստորագրման հարցը: Հավելյալ արձանագրությունը նախատեսում է ուժեղացված հսկողություն իրանական միջուկային օբյեկտների վրա:
