Մեկուկես տարվա մեջ առաջին անգամ Կարեն Կարապետյանը Եվրոպա այցելեց, և Շվեյցարիա-Հայաստան առևտրային պալատի ներկայացուցիչների և շվեյցարացի գործարարների հետ հանդիպմանը կոչ արեց գալ և Հայաստանում ներդրումներ անել: «Ժողովրդական» կուսակցության նախագահ Տիգրան Կարապետյանը, որը խորհրդարանական ընտրություններին մասնակցում էր ՕՐՕ դաշինքով, վարչապետի այս հայտարարությունը լոկ խոսքեր է համարում, ոչ ավելի։ «Իբրև փոփոխություն է կատարվել, տեխնիկականն ավելի առաջ է մղվել, քան քաղաքականը, բայց ոնց կար, այդպես էլ կա: Ավտորիտար պետություն է, ոնց ուզում, այդպես էլ անում են, քանի որ օլիգարխները իրենցն են, ապրանքներն իրենցն են, փողն իրենցն է»,- ասաց Տիգրան Կարապետյանը՝ հավելելով, որ այս մեկուկես տարվա մեջ որևէ էական փոփոխություն կառավարության աշխատանքում չի տեսել:
Անդրադառնալով հունվարի մեկից սկսված թանկացումներին և «Ելք»-ի՝ թանկացումների դեմ պայքարին, Տիգրան Կարապետյանը նշեց. «Ելք»-ն ընդդիմադիր չի, ես չեմ ուզում խորանալ այդ քաղաքականության մեջ։ Հայաստանում ինչպես կա, այդպես էլ կմնա՝ մինչև ժողովուրդը չհասկանա, որ ընտրակաշառք չպետք է վերցնի և դրանով նպաստի այս վիճակին, մինչև չհասկանա, ողբերգական վիճակում է լինելու»:
Արդյո՞ք ընդդիմադիրները չպետք է ուղղորդեն հանրությանը, Տիգրան Կարապետյանը զայրացավ. «Ինչքա՞ն ուղղորդենք, ինչքա՞ն ասենք, ինչքան աղաչենք-պաղատենք, մենք էլ ասում ենք՝ ասողին լսող է պետք»:
