Հատուկ քննչական ծառայությունը որոշում է կայացրել մերժել ԱԺ «Ժառանգություն» խմբակցության ղեկավար Զարուհի Փոստանջյանի պահանջը՝ քրեական գործ հարուցել «Հայոց արծիվների» ղեկավար Խաչիկ Ասրյանի դեմ, ավելին՝ ԱԺ պատգամավորին ոստիկաններն արդեն չեն ուղեկցում:
«Առաջին լրատվական»-ի հարցին՝ ինչո՞վ է դա պայմանավորված, արդյո՞ք անապահովության զգացողություն այլևս չկա, Փոստանջյանը պատասխանեց, որ ոստիկաններն իրենք են որոշել այլևս դադարեցնել իր պաշտպանությունը: «Ես չեմ կարծում, որ մենք ապահով երկրում ենք ապրում: Խնդիրներն, իհարկե, մնում են, բացի այդ, պետք է ասեմ՝ Հատուկ քննչական ծառայությունը մերժել է քրեական գործի հարուցումը, սակայն իմ կողմից այդ որոշումը բողոքարկվելու է վերադասության կարգով, ապա՝ նաև դատարանում»,- ասաց նա՝ հավելելով, որ ամենայն հավանականությամբ բողոքը կուղարկի հենց վաղը, իսկ ՀՔԾ որոշումը ստացել է երեկ:
Հիշեցնենք, որ Ստրասբուրգում ԵԽԽՎ նիստի ժամանակ Զարուհի Փոստանջյանի՝ Սերժ Սարգսյանին ուղղված հարցից հետո Խաչիկ Ասրյանն ասել էր, որ ԱԺ պատգամավորին պետք է այրել խարույկի վրա:
