Ինքնասպանությունները խթանող հանգամանքներ կարող են լինել և սթրեսները, և ժառանգական գործոնները, և եղանակային անցումային շրջանները, և անձնային հատկանիշները: Այսօր տեղի ունեցած մամուլի ասուլիսի ժամանակ այս մասին ասաց հոգեբան Սամվել Խուդոյանը՝ հավելելով, որ մարդուն կարող են ինքնասպանության դրդել նաև հիասթափություններն ու կորուստները:
«Ծանր ապրումներին դիմակայելու անընդունակությունը ինքնասպանության դիմելու մյուս պատճառն է: Հատկանշական է, որ ինքնասպանությունների առավել հակված են դեպրեսիվ մարդիկ: Միաձու երկվորյակների մոտ, որոնցից մեկն ինքնասպան է եղել, ինքնասպանության մասին մտքերը մոտ 15 անգամ ավելի են, քան սովորական մարդկանց մոտ: Ընդ որում, տարբեր մարդիկ սթրեսային իրավիճակներից տարբեր կերպ են դուրս գալիս. մեկը խմում է, մյուսը՝ գնում միայնակ զբոսանքի, երրորդը՝ զրուցում մտերիմի հետ»,- ասաց հոգեբանը` հավելելով, որ տարբեր ազգերի թվում հայերը ինքնասպանության դիմելու հակվածությամբ զբաղեցնում են վերջին հորիզոնականները:
«Հայերն ինքնասպանության հիմնականում դիմում են սոցիալական ծանր վիճակից, հարազատների կորստից դրդված, հազվադեպ` սիրահարվածության ֆոնին: Առաջին տեղում սկանդինավյան ժողովուրդներն են: Իսկ ահա ամերիկացիները նախկին 9-րդ հորիզոնականից բարձրացել են հինգերորդ հորիզոնական»,- ասաց Սամվել Խուդոյանը:
Նրա խոսքով՝ ինքնասպանության առավել հաճախ դիմում են պատանիներն ու 65 տարեկանից բարձր անձինք:
Հոգեբանը նշեց, որ ինքնասպանության դիմելու մտադրության ունեցող մարդը կարող է շատ ինտենսիվ ազդանշաններ ուղարկել շրջապատին, օրինակ՝ հարցնել հուղարկավորության ծախսերի մասին, խոսել կյանքի անիմաստության թեմայով, ասել, որ անկարող է կորստից հետո շարունակել ապրել այս աշխարհում և այլն:
Ամփոփելով՝ Սամվել Խուդոյանը նշեց, որ իրենք զգոնության կոչ են անում ինքնասպանության հակում ունեցող մարդկանց հարազատներին՝ հետևելու նրանց վարքին:
Լուսանկարը՝ PanARMENIAN Photo-ի
