Եթե Անկարան Ռուսաստանից C-400 ձեռք բերի, անհրաժեշտ կլինի վերանայել ՆԱՏՕ–ում Թուրքիայի անդամակցության հարցը,– ասել է սենատոր Բեն Սասը։
Ամերիկյան սենատորը քննադատել է Թուրքիայի իշխանություններին Ամերիկյան ձեռնարկատիրության ինստիտուտում կայացած կոնֆերանսի ժամանակ։
Վաշինգտոնյան կոնֆերանսի օրակարգում ընդգրկված է եղել Freedom House միջազգային իրավապաշտպան կազմակերպության տարեկան հաշվետվությունը։ Ամերիկյան սենատորը հատուկ անդրադարձել է Թուրքիայում անազատության հարցին, հիշեցրել է նաև, որ ընթացիկ տարում Freedom House–ը ներառել է Թուրքիան «անազատ» երկրների ցանկում։
Սենատորի խոսքերով՝ ազատության հարցում Թուրքիան «ոտից գլուխ է շրջվել»։
«Եթե Էրդողանը ավարտին հասցնի հրթիռային С-400 համալիրի ձեռք բերման գործարքը, այդ դեպքում կարիք կլինի վերանայել նրա անդամակցությունը ՆԱՏՕ–ին»,– նշել է սենատորը։
Հիշեցնենք, որ Թուրքիան և Ռուսաստանը հրթիռային համալիրի մատակարարման պայմանագիր են ստորագրել 2017 թվականի սեպտեմբերին։
