Նախկին քաղբանտարկյալ, այսօրվա «հերոս» Շանթ Հարությունյանի «հեղափոխությունը» ունեցել է նաև իր նախապատմությունը:
Վերջինիս Facebook-ի էջը ողողված է դիմակավոր անձանց խորհրդավոր կերպարներ և բազիմաստ մակագրություններ պարունակող նկարներով:
Ստորև ներկայացնում ենք դրանց մի մասը. «Եթե Հայաստանն ուզում է իր արժանապատիվ գոյությունն ապահովել նոր ձևավորվող համաշխարհային քաղաքակրթական համակարգում, ուրեմն՝ պետք է ձևավորի իր քաղաքական իդեալը, իր քաղաքական լեգենդը»:
«Սերը ավելին է, քան արդարությունը, սերը զգացողություն է, արդարությունը՝ ընդամենը պայմանական հասկացություն, սիրուց են ծնվել բոլոր մարդկային առաքինությունները, բարձր արժեքները, այդ թվում՝ արդարությունը, երբ որևէ հասարակության մեջ մեռնում է սերը, այնտեղ մեռնում է ամեն մի առաքինություն, ամեն բարձրագույն արժեք, այդ թվում և արդարությունը»:
«Այն ժողովուրդը, որ դադարում է առաքելություն ունենալ, վերանում է պատմության ասպարեզից: Հայաստանը բոլորիս հայրենիքն է, մեզանից յուրաքանչյուրի տունը, և ոչ ոք իրավունք չունի սեփականաշնորհել այն՝ լինի պրեզիդենտ, թե օլիգարխ, դատախազ, թե նախարար»:
Սեփական մտքերից բացի Հարությունյանը երբեմն ապավինում է Գարեգին Նժդեհի խոսքերին, ինչպես «Ուժեղ, հավատավոր և պայքարունակ դառնալու համար անհատների նման ժողովուրդները ևս պիտի վերանորոգվեն մշտապես: Կորցնելով վերանորոգելու ընդունակությունը՝ ժողովուրդները կորցնում են իրենց ապրելու, ստեղծագործելու, պայքարելու հավատը», «Ազգովի դժբախտ է հայը, որովհետև իր մտավորականության մի մասը դեռ չի հասկանում, որ օրվա ցեղախռով ազգերի կյանքում էականը քաղաքական վարչաձևը չէ, այլ անհատի և զանգվածների վերածնունդը՝ հեղափոխությունը»:
Լևոն Շանթի՝ «Ազատություն չեն տար, ազատությունը կխլվի» միտքը ևս արժանացել է Հարությունյանը ուշադրությանը:
Ուշագրավ է նախկին քաղբանտարկյալի հատկապես մի գրառում. «Հայաստանի այսօրվա իշխանությունները սարսափում են խոսքի ուժից, ճշմարիտ խոսքից, ինչի համար և իմ նմաններին փակում են զնդաններում»:
