Այսօր Անոնիմուսների օրն է. այդ օրը Գայ Ֆոքսի դիմակներով աշխարհի տարբեր քաղաքներում երթեր և ցույցեր են կազմակերպում` պահանջելով ավելի արդար կառավարում, ավելի արդար իշխանություն: Անոնիմուսների օրը նշվեց նաև Երևանի կենտրոնում, Գայ Ֆոքսի դիմակ հագած մարդիկ երթ սկսեցին Երևանում. նրանց առաջնորդում էր Շանթ Հարությունյանը: Վերջինս հետևեց Գայ Ֆոքսի օրինակին, ով Անգլիայի խորհրդարանի շենքը պայթեցնելու միջոցով ցանկանում էր սպանել Հակոբ 1-ին և փոխել Անգլիայի իշխանությունը:
Շանթ Հարությունյանն իր ակցիան սկսեց Ազատության հրապարակից՝ շարժվելով դեպի Մաշտոցի պողոտա իր ետևից տանելով Ազատության դիմակը կրող իր համախոհներին: Ինչպես հաղորդում է մեր թղթակիցը, շուրջ 100 մարդ: Մինչև ակցիան սկսելը նա իր հագից հանել է զրահաբաճկոնը և հագցրել որդուն՝ ասելով, որ ինքը գնում է մեռնելու, իսկ որդին պետք է մնա և շարունակի իր գործը: Ակտիվիստները երթը մեկնարկել են երկար փայտե մահակները ձեռքներին, որոնցով, ինչպես իրենք էին ասել, հարվածելու էին ոստիկաններին անհրաժեշտության դեպքում:
Հարությունյանն իր համախոհներով, չլսելով ոստիկանների հորդորները, ճեղքեց Մաշտոցի պողոտան, ոստիկանները փորձեցին նրան ետ բերել, սակայն նա թեքվեց, շարժվեց բանուկ փողոց, մահակով հարվածեց ոստիկանին, նույնը սկսեցին անել նրա համախոհները, ոստիկանները փորձեցին ակտիվիստներին ետ շպրտել դեպի մայթ, սակայն նրանք հագուստի արանքներից հանեցին պայթուցիկ նյութեր և սկսեցին շպրտել ոստիկանների ոտքերի տակ: Առաջացավ խուճապ, որի արդյունքում ակտիվիստներն ու ոստիկաններն իրար մահակներով ծեծի ենթարկեցին: Մի քանի րոպե պայթյունները Մաշտոցի պողոտայում չէին դադարում, երբ ոստիկանության ուժերը համալրվեցին և ակտիվիստներին փորձեցին մեկուսացնել:
Այժմ ոստիկանները փակել են Մաշտոցի պողոտան փորձաքննություն անցկացնելու պատճառով, կանգնած է երթևեկությունը, Շանթ Հարությունյանը բերման է ենթարկվել ակցիայի առավել ակտիվ մասնակիցների հետ միասին: Շատերի ինքնազգացողությունը վատացել է, դեպքի վայր է ժամանել նաև «Շտապօգնություն»-ը:
Լուսանկարը՝ Գալա-ի
