Երեկ մամուլում տեղեկություն էր տարածվել, որի համաձայն՝ Հայաստանի ըմբշամարտի ֆեդերացիան ֆինանսական խնդիրների առջև է կանգնած: Մասնավորապես նշվում էր, որ ըմբիշներն ամիսներ շարունակ աշխատավարձ չեն ստանում, իսկ աշխարհի մինչև 23 տարեկանների առաջնությանը հայ մարզիկները գնացել են սեփական միջոցներով՝ վճարելով մոտավորապես հազարական ամերիկյան դոլար:
Հիշեցնենք, որ ռուսաստանաբնակ գործարար Սամվել Կարապետյանի՝ Հայաստանի ըմբշամարտի ֆեդերացիայի նախագահի պաշտոնից հեռանալուց հետո հայկական ըմբշամարտն անցել էր ՀԱՕԿ նախագահ Գագիկ Ծառուկյանի հովանավորչության տակ: Լրագրողների հետ հանդիպմանը ՀՀ սպորտի նախարար Հրաչյա Ռոստոմյանը, որը նաև ՀՀ ըմշամարտի ֆեդերացիայի նախագահի պաշտոնակատարն է, հավաստիացրեց, որ հայկական ըմբշամարտը որևէ խնդիր չունի, և Գագիկ Ծառուկյանը շարունակում է աջակցել մարզաձևին: «Եթե ամեն հաչացող շան հետևից գնանք, աշխատելու ժամանակ չենք ունենա: Նախորդ տարի մեր ըմբիշները 28 մեդալ են նվաճել տարատեսակ մրցումներում: Աշխարհում շատ երկրներ կերազեին նման նվաճումների և նման ֆեդերացիա ունենալու մասին»,- ասաց Ռոստոմյանը:
Հունա-հռոմեական ոճի ըմշամարտի Հայաստանի հավաքականի գլխավոր մարզիչ Լևոն Ջուլֆալակյանն էլ նշեց, որ իրենք օրերս հանդիպել են Գագիկ Ծառուկյանին, և վերջինիս հետ հաստատվել է 2018 թվականի օրացուցային պլանը: «Հուրախություն մեզ՝ Ծառուկյանը շարունակում է մնալ հայկական ըմշամարտի կողքին»,- նշեց Ջուլֆալակյանը: Ըմբշամարտի ֆեդերացիայի մրցավարական հանձնաժողվի նախագահ Սամվել Հարությունյանն էլ հայտարարեց, որ ցանկացած ընտանիքում լինում են խնդիրներ, որոնք, սակայն, պետք է լուծեն ընտանիքում, և կարիք չկա դրանք ի ցույց դնելու:
Առավել մանրամասն՝ տեսանյութում:
