Սպանության փորձի համար 10 տարվա ազատազրկման դատապարտված քաղաքագետ Արկադի Վարդանյանի փաստաբան Նիկոլայ Բաղդասարյանը իր պաշտպանյալի ռեժիմի փոփոխության մերժման որոշումը դատական կարգով բողոքարկել է, և առաջիկա օրերին ընդհանուր իրավասության դատարանը կորոշի՝ հիմնավո՞ր է եղել քրեակատարողական վարչության որոշումը, թե՞ ոչ։
Նշենք, որ Արկադի Վարդանյանը նախապես դիմում էր ներկայացրել քրեակատարողական հիմնարկի ղեկավարությանը, որպեսզի իր պատժի կրման կիսափակ ռեժիմը փոխվի և իրեն հնարավորություն տրվի հաջորդիվ պատիժը կրել կիսաբաց ռեժիմում։ Բաղդասարյանն «Առաջին լրատվական»-ի հետ զրույցում ասաց, որ Վարդանյանի պահանջն օրենքի շրջանակներում է, քանի որ օրենքով ռեժիմի փոփոխության համար սահմանված պատժաչափն արդեն կրել է:
«ՔԿՀ-ն իր որոշմամբ մերժել է Վարդանյանի ռեժիմի փոփոխությունը։ Հիմա ես դիմել եմ դատարան դատական կարգով վերացնելու այդ որոշումը։ Հիմա եթե դատարանն էլ մերժի և ուժի մեջ թողնի ՔԿՀ որոշումը, ես դիմելու եմ Մարդու իրավունքների եվրոպական դատարան։ Ուրիշ ճանապարհ չկա։ Այստեղ Եվրոպական կոնվենցիայի երրորդ հոդվածի ակնհայտ խախտում կա: Մարդուն պահում են ավելի վատ պայմաններում, քան օրենքով նախատեսված է»,- ասաց Բաղդասարյանը՝ հավելելով, որ մերժելու հիմք իրականում չկա։ Այն, ինչ գրված է ՔԿՀ որոշման մեջ, օրենքով նախատեսված չէ։ «Չի կարելի մարդու անվտանգության հիմնավորմամբ նրա ռեժիմը չփոխել։ Այդպիսի բան բնության ու իրավաբանության մեջ չկա։ Եթե որևէ ՔԿՀ-ի ղեկավար չի կարողանում ապահովել դատապարտյալի անվտանգությունը, պետք է հրաժարական տա»,- ասաց փաստաբանը։
Նիկոլայ Բաղդասարյանն ասաց, որ Արկադի Վարդանյանի վիճակը շատ վատ է։ Նա գտնվում է «Արմավիր» ՔԿՀ-ում։ «75-80-ն անց մարդու առողջական վիճակը չի կարող լավ լինել, երբ ինքը մեկուսացված վիճակում է»։
Հիշեցնենք, որ Արկադի Վարդանյանը 10 տարվա անազատության է դատապարտվել 2013 թվականին։ Նա մեղադրվեց իր ընկերոջ հորը թունավորելու փորձի համար: Ազգային անվտանգության ծառայության կողմից իրականացված միջոցառումների արդյունքում 2013-ի մայիսի 18-ին Երևան քաղաքում Արկադի Վարդանյանից բացի՝ նրա հետ ձերբակալվել էր նաև Արսեն Ավետյանը։ Նրանք երկուսն էլ կասկածվում էին Արսեն Ավետյանի հոր` Ռոբերտ Ավետյանի սպանությունը նախապատրաստելու մեջ, ինչը հետագայում արդեն դատարանի վճռով հիմնավորվեց։ Հոր սպանությունը նախապատրաստելու մեջ մեղադրվող Արսեն Ավետյանն էլ դատապարտվեց 11 տարվա անազատության։
