«Մենք այստեղ նախատեսել էինք 600-800 ուսանող, սակայն քանի որ գրանցումները շատ-շատ էին, մենք ավելացրինք թիվը և այժմ ունենք շուրջ 2000 ակտիվ ուսանող։ Ունենք 4 հիմնական ոլորտներ և 10 հմտություններ․ ոլորտներն են՝ անիմացիա, խաղերի ստեղծում, կայքերի մշակում և ֆիլմերի ստեղծում, իսկ խաչվող հմտություններ են ռոբոտաշինություն, եռաչափ մոդելավորում, ծրագրավորում և այլն։ Թումոն արվեստի և տեխնոլոգիաների խաչմերուկ է»,- «Առաջին լրատվական»-ի հետ զրույցում ասաց Գյումրիի Թումո կենտրոնի ղեկավար Նարե Ավագյանը։
Վերջինիս խոսքերով՝ այն, որ ի սկզբանե նախատեսված էր ունենալ 800 ուսանող, սակայն հիմա նրանց թիվը հասնում է 2000-ի և դեռևս 400 ուսանող էլ սպասում է գրանցվելու իրենց հերթին, լավագույն ապացույցն է այն բանի, որ գյումրեցի երեխաների հետաքրքրվածությունն այս կենտրոնի նկատմամբ շատ մեծ է։
«Կարծում եմ, որ բոլոր երեխաներն՝ անկախ իրենց բնակության քաղաքից, ունեն մեծ պոտենցիալ․ շատ կարևոր է, որպեսզի յուրաքանչյուր ուսանողի առանձնահատուկ մոտեցում ցուցաբերվի, իսկ Թումոն մի գործիք է, մի վայր է, որն օգնում է յուրաքանչյուր ուսանողի իր ստեղծարար պոտենցիալը բացահայտել»,- հավելեց բանախոսը։
Նշենք նաև, որ Գյումրիի Թումո կենտրոնը հիմնադրվել է 2015թ-ին։
Մանրամասները՝ տեսանյութում։
