Ընդդիմադիր քաղաքական գործիչները և իրավապաշտպան կազմակերպությունների ներկայացուցիչները իշխանություններից պահանջում են անհապաղ օրենք ընդունել, որը վերջ կդնի երեխաների հետ ամուսնություններին հավանություն տվող իսլամական օրենքների կիրառմանը։
«Hurriyet»-ը և այլ թուրքական ԶԼՄ–ներ գրում են, որ նախօրեին, Կրոնի հարցերով վարչությունը իր պաշտոնական կայքում հաղորդել է, որ տղաների համար ամուսնության նվազագույն շեմը տասներկու տարեկանն է, իսկ աղջիկներինը՝ ինը։ Գրառումը կայքում հայտնվել էր որպես իսլամի օրենքների մեկնաբանում և հեռացվեց այն բանից հետո, երբ կառույցի հասցեին բազմաթիվ քննադատական դիտողություններ հնչեցին։ Բոլոր դժգոհներին հանգստացնելու համար՝ Կրոնի հարցերով բարձրագույն հանձնաժողովի նախագահ Էքրեմ Քելեսը շտապեց հայտարարել, որ ամուսնության նվազագույն տարիքը տղաների և աղջիկների համար 17-18 տարեկանն է՝ համապատասխանաբար, քանի որ նույնիսկ 15 տարեկան երեխան չպետք է ամուսնանա։ Օրենքով, Թուրքիայի քաղաքացիները կարող են ամուսնանալ 18 տարեկանում, սակայն որոշ դեպքերում, դատարանի թույլտվությամբ, թույլատրելի նվազագույն տարիքը կարող է լինել 16-ը։
