Ապրիլյան քառօրյա պատերազմից հետո Թալիշից Չարենցավան տեղափոխված Էլեոնորա Նարիմանյանն արդեն մոտ երկու տարի է՝ միայնակ բնակվում է Չարենցավան քաղաքում։ Միակ մխիթարանքը իր բնակարանի ծաղիկներն են, որոնք առանձնակի խնամքով է աճեցնում, քանի որ հիշեցնում են Թալիշը։ Թալիշում էլ մեծ ծաղկանոց ուներ, տան ծաղիկներ։
«Ամեն օր ջրում եմ, խնամում եմ, մտքով տեղափոխվում եմ Թալիշ։ Շատ եմ սիրում ծաղիկներ աճեցնել։ Էնպիսի վարդեր էի աճեցնում Թալիշում, մենակ տեսնեիք…»,- «Առաջին լրատվական»-ի հետ զրույցում պատմեց տիկին Էլեոնորան։
Ապրիլյան քառօրյա պատերազմի ժամանակ Թալիշի իր երկհարկանի բնակարանից խալաթով ու հողաթափերով է փախչել՝ չհասցնելով ոչ մի բան վերցնել իր հետ։ Պատերազմի ավարտից հետո միայն եղբայրը հետ է գնացել Թալիշ ու ավիրված տնից վերցրել մի քանի լուսանկար։ Հենց այդ լուսանկարներն են տիկին Էլեոնորայի մխիթարանքը։ Հսկայական տնից ուրիշ ոչ մի բան փրկել չի հաջողվել։ Թալանել էին՝ պատմեց մեր զրուցակիցը։
Տիկին Էլեոնորայի որդիները տարբեր երկրներում են, աղջիկը՝ Երևանում, բայց ոչ մեկի մոտ էլ չի ուզում տեղափոխվել։ Ուզում է վերադառնալ հայրենի գյուղ, որտեղ իր տունն է եղել, իր ամուսնու գերեզմանը։ «Բայց չգիտեմ՝ էդպես երազելով էլ կմնանք, թե մի օր էս կռիվը կվերջանա, ու կկարողանանք մեր հող ու ջրին վերադառնալ։ Չգիտեմ…»։
Առավել մանրամասն՝ տեսանյութում:
