Ջերմոցային տնտեսությունները փորձում են ջեռուցման այլընտրանքային միջոցներ օգտագործել։ Այս մասին այսօր լրագրողների հետ հանդիպման ժամանակ ասաց Հայաստանի ջերմոցային ասոցացիայի նախագահ Պողոս Գևորգյանը։ «Մենք ինֆրակարմիր աղբյուրներով ջերմատները տաքացնելու նոր ուղի ենք ներդնելու, որը էլեկտրականությամբ է տաքացնում և գազից 20-30%-ով խնայողաբար է աշխատում։ Գազից մենք ուզում ենք արդեն ազատվել, որովհետև «ՀայՌուսգազարդը մի քանի ջերմատուն սնանկացրել է։ Գյումրիում մի քանի միլիոն դրամի պատճառով գյումրեցիներից մեկի գազը անջատեցին, ամեն ինչ ցրտահարվեց, ձյունը եկավ նստեց, ապակիները ջարդվեցին, և սնանկացավ այդ մարդը։ 2 տարի առաջ էլ Ստեփանավանի ջերմատունը սնանկացրին։
Մենք չենք ասում, թե փող չենք տալու, ձմեռը վառում ենք, գալիս են մարտ ամսին, ասում ենք՝ մի 2 շաբաթ սպասեք, լոլիկը վաճառենք, տանք Ձեր փողը, ասում են` չէ, ու անջատում են։ Ոնց որ թշնամի լինեն։ Տասնյակ տարիներով մարդիկ չարչարվել ստեղծել են այդ ջերմատները, բազմաթիվ մարդիկ են աշխատում այդտեղ։ Այսօր մի քառ. մետր ջերմատուն կառուցելու համար 100-150 դոլար է պետք»,- ասաց Պ. Գևորգյանը։
Բիզնեսի աջակցման կենտրոնի տնօրեն Սամվել Գևորգյանն էլ նշեց, որ որպես այս խնդրի լուծում կարող է լինել վճարումների դիվերսիֆիկացված համակարգը այնպես, որ ջերմատները ավելի քիչ վճարեն ձմռանը և ավելի շատ՝ բերքը վաճառելու սեզոնին։