ԱՄՆ նախագահ Դոնալդ Թրամփի կողմից Երուսաղեմի՝ որպես Իսրայելի մայրաքաղաք ճանաչումը լուրջ խնդիրների առաջ է կանգնեցրել Երուսաղեմի հայկական պատրիարքությանը:
«Առաջին լրատվական»-ի հետ զրույցում Երուսաղեմի հայոց պատրիարքության դիվանապետ Կորյուն վարդապետ Բաղդասարյանը նշեց, որ այս պահին իրավիճակը խաղաղ է, հայտարարությունից հետո զինվորական և ոստիկանական ուժերը կարողացան իրավիճակը հսկողության տակ պահել, և այդ հայտարարությանը հաջորդող բախումները մեծ ծավալներ չընդգրկեցին»,- «Առաջին լրատվական»-ի հետ զրույցում ասաց Երուսաղեմի հայոց պատրիարքության դիվանապետ Կորյուն վարդապետ Բաղդասարյանը՝ նկատի ունենալով Երուսաղեմը Իսրայելի մայրաքաղաք ճանաչելու ԱՄՆ նախագահ Դոնալդ Թրամփի հայտարարությունը:
Նրա խոսքերով՝ բախումները հիմնականում Պաղեստինում են, Երուսաղեմում հանգիստ է. «Երուսաղեմում միայն ուրբաթ օրերը՝ մահմեդականների աղոթքից հետո են բախումներ տեղի ունենում, բայց դրանք հսկողության տակ են առնվում»:
Հայր Կորյունից հետաքրքրվեցինք՝ ինչպես են գնահատում ՄԱԿ-ի Գլխավոր ասամբլեայի ընդունած բանաձևը, որին միացել է Հայաստանը: Բանաձևով կոչ է արվել ԱՄՆ-ին հետ կանգնել Երուսաղեմն Իսրայելի մայրաքաղաք ճանաչելու իր որոշումից: Հայր Կորյունը զուգահեռներ անցկացրեց 1967 թվականի հետ, երբ յոթօրյա պատերազմի հաղթանակի արդյունքում Իսրայելը վերահսկում է քաղաքի ամբողջ տարածքը, բաժանում Արևելյան Երուսաղեմը Հորդանան գետի արևմտյան ափից և հայտնում Երուսաղեմում իր սուվերենության մասին։ ՄԱԿ-ի կողմից այդ ժամանակ նորից բանաձև ընդունվեց, որ չի ճանաչում այդ տարածքների վրա Իսրայելի ինքնիշխանությունը և բանաձև ընդունեց, որ ճանաչում է այդ տարածքները՝ որպես գրավյալ տարածքներ: «Կարծում եմ՝ հավատարիմ են մնացել իրենց նախկինում ընունած որոշմանը, և տրամաբանորեն այդպես պետք է լիներ»,- հավելեց հայր Կորյունը:
Անդրադառնալով հայկական կալվածքների վտանգման հարցին՝ մեր զրուցակիցը նշեց, որ ադմինիստրատիվ առումով հայտարարությունից հետո ինչ-որ նոր բան չփոխվեց, մինչ հայտարարությունն էլ Հին քաղաքը Երուսաղեմի քաղաքապետարանի հետ անմիջական իրավասության ներքո էր, արտոնությունների, հարկերի-տուրքերի վճարման առումով անմիջական կապ է եղել. «Պարզապես պետք է սպասենք և տեսնենք՝ դեսպանատունն իրոք կտեղափոխվի՞, թե՞ ոչ»,- ասաց հայր Կորյունը՝ հավելելով, որ Թրամփի հայտարարության մեջ անորոշության ինչ-որ երանգ կար: Նրա խոսքերով՝ հիմա պետք է սպասել-տեսնել՝ իրոք դեսպանատունը կտեղափոխվի՞, թե՞ ոչ:
«Թրամփն իր խոսքի մեջ նշեց, որ հրահանգում է ճարտարապետներին, ինժեներներին նոր դեսպանատան համար ծրագիր կազմել և երկրորդը՝ շատ հստակ նշեց, որ Երուսաղեմի սահմանների հետ կապված խնդիրներ կա»,- հավելեց նա:
