«Ես, կինս ու էլի շատ շատերը դեպքից հետո եղել ենք եղբորս տանը, տեսել ենք Ռուզաննային։ Նրա վրա ոչ ես, ոչ ինչ որ մեկը, մի խազ անգամ չի տեսել։ Ամոթ է, պետք չի մեռած մարդու անունը ծաղրել։ Թե չէ իմ համբերությունը հավերժ չէ»,- «Առաջին լրատվական»-ի հետ զրույցում ասաց Արմավիրի մարզպետի սպանված խորհրդական Մանուկ Սիմոնյանի եղբայրը՝ Արամ Սիմոնյանը։
Նշենք, որ Ռուզաննա Մկրտչյանի պաշտպան Նաիրա Պետրոսյանը նախաքննության ավարտից հետո մեզ հետ զրույցում ասել էր, որ իր պաշտպանյալը միանշանակ պետք է անմեղսունակ ճանաչվի, դրա համար էլ միջնորդել են կրկնակի փորձաքննություն իրականացնել, քանի որ առաջին փորձաքննությամբ Ռուզաննան մեղսունակ է ճանաչվել։ Փաստաբանը նաև նշել էր, որ Ռուզաննան տարիներ շարունակ խոշտանգվել է, ծեծվել, գործում բազմաթիվ ապացույցներ կան: Դեպքի օրը ևս դաժան ծեծի էի ենթարկվել, ապա աֆեկտի ազդեցության տակ տեղի է ունեցել սպանությունը։
Արամ Սիմոնյանի խոսքերով, սակայն, աֆեկտի ազդեցության տակ գտնվողը չէր կարող սպանություն իրականացնել, ապա խնամքով դիակը փաթաթել, մետաղալարով կապեր, տաներ-գցեր ձորը ու գլխին էլ մի ծանր քար դներ։ «Ինչ աֆեկտ, ինչի մասին է խոսքը։ Իմ համբերությունը հավերժ չէ։ Վերջ ի վերջո իմ եղբայրն իրենց հաց ու ջուր է տվել, անուն, պատիվ, հարգանք։ Որտեղ նստել՝ խոսել է ամենալավը, թե՛ իրենցից՝ ընտանիքի անդամներից, թե՛ Ռուզաննայի ծնողներից։ Այդ խոսողները, որոնք այսօր սոխակ են դառել, թող ասեն, թե իրենցից որ մեկը կհանդուրժեր կնոջ արարքը՝ ընտանեկան ոսկի բաժանելուն, այն էլ սուրբ արարողությունը, առանց իրեն կատարելուն։ Թե չէ ծեծել, խոշտանգել, նվաստացրել։ Ինչի մասին է խոսքը։ Իմ եղբայրը դարձել է ընտանեկան դրամայի զոհ»,- նշեց կրտսեր Սիմոնյանը։
Նշենք, որ Արամ Սիմոնյանը դեպքից հետո մեզ հետ զրույցում նշել էր, որ իր եղբորը սպանել է ոչ թե կինը, այլ որդին՝ Նորիկը, իսկ պատճառը եղել է այն, որ Մանուկ Սիմոնյանը հավանություն չի տվել որդու ընտրությանը՝ հարսնացուին։ Ռուզաննան էլ Մանուկից գաղտնի, ընտանեկան ավանդույթներով փոխանցված մատանի է նվիրել որդու հարսնացուին։ Դա է եղել վիճաբանության պատճառը, որից հետո Մանուկը ասել է, որ միայն իր դիակի վրայով այդ աղջիկը կմտնի իրենց տուն, որից հետո էլ տեղի է ունեցել սպանությունը։ «Դեպքից հետո ամբողջ տունը հեղեղված էր արյունով։ Հենց կրիմինալիստները տուն մտան, մեկն ասաց՝ վայ, Աստված իմ, այս ինչ է կատարվել այս տանը, այսօր մինչև գիշեր ստեղ ենք։ Ասաց՝ եղբայր, այս տունը ծփում է արյունով։ Հետքերն ամենուր էին, պատերին, սեղանի տակ, աղբարկղում, դռների վրա։ Չնայած՝ երեք օր մաքրել էին։ Ալիսիկն էլ հետները։ Իմացել է, թե չի իմացել, մասնակցել է հետքերի մաքրմանը»,- ասաց եղբայրը։
Արամ Սիմոնյանը նշեց, որ իր տեղեկություններով, հնարավոր է Ռուզաննան ազատ արձակվի. «Մեկ ա, վերին ատյաններից խոստացել են, ազատելու են, բայց թող ազատեն, ինքը մեղավոր չի։ Եթե պետք լինի, ազատելու համար ես ինքնս կմիջնորդեմ»,- ասաց եղբայրը։
Արամ Սիմոնյանը նշեց, որ գործի նյութերին ծանոթանալուց հետո, նոր միայն կարող է ավելի փաստարկված խոսել, քանի որ գործում կան բաներ, որոնց ինքը տեղյակ չէ։
