«Մանչեսթեր Յունայթեդի» կիսապաշտպան Հենրիխ Մխիթարյանը 7-րդ տարին անընդմեջ ճանաչվեց Հայաստանի լավագույն ֆուտբոլիստ: Հերթական անգամ Մխիթարյանը մրցակցությունից դուրս էր, և, ցավոք, չունենք գոնե մեկ ֆուտբոլիստ, որը կարող է լավագույնը ճանաչվելու հայտ ներկայացնել: Քվեարկության արդյունքում երկրորդը ճանաչվել է Մակեդոնիայի «Վարդարի» հարձակվող Տիգրան Բարսեղյանը, իսկ լավագույն եռյակը եզրափակել է Եկատերինբուրգի «Ուրալի» պաշտպան Վարազդատ Հարոյանը:
Հենրիխ Մխիթարյանին դասելով այլ հարթության մեջ և նրան համարելով անկախ Հայաստանի բոլոր ժամանակների լավագույն ֆուտբոլիստ՝ փորձենք հասկանալ, թե երկրորդ օղակում ով է լավագույնը: Զերծ մնալով տարատեսակ քվեարկությունից՝ «Առաջին լրատվական»-ը կարծում է, որ լավագույն ֆուտբոլիստը, այնուամենայնիվ, Վարազդատ Հարոյանն է: Շատերը բնականաբար կհակադարձեն՝ պնդելով, որ Տիգրան Բարսեղյանը փայլում է «Վարդարի» կազմում, շարունակ գոլեր է խփում, գրավել է թուրքական «Ֆենարբախչեի» դարպասը… Բարսեղյանի ելույթները «Վարդարում» իսկապես տպավորիչ են: Շարունակ նշվում է, որ Բարսեղյանի ծառայություններով հետաքրքրված են ավելի բարձրակարգ թիմեր: Այո, Բարսեղյանը մեր հեռանկարային ֆուտբոլիստներից է, բայց չի կարող երկրորդ օղակում լինել լավագույնը՝ մի պարզ պատճառով, որ նրա խաղը ազգային հավաքականում այնքան էլ չի տպավորում:
Մեր հավաքականի գլխավոր մարզիչ Արթուր Պետրոսյանը Բարսեղյանին օգտագործեց տարբեր դիրքերում: Ինչ խոսք, Բարսեղյանը մեծ ծավալի աշխատանք կատարեց, սակայն չարդարացրեց սպասելիքները: Եթե Բարսեղյանին հաջողվեր, օրինակ, Ռումինիայի հետ մրցավեճում օգտագործել իրական գոլային պահերից գոնե մեկը, պատկերը բոլորովին այլ կլիներ: Երբ ֆուտբոլիստը ռմբարկուի հատկանիշներով փայլում է ակումբում և չի կարողանում աչքի ընկնել հավաքականում, ապա կա խնդիր: Հուսանք, որ առաջիկայում Բարսեղյանը կկարողանա գոլեր խփել նաև Հայաստանի ազգային հավաքականի կազմում:
Ի տարբերություն Բարսեղյանի՝ Վարազդատ Հարոյանը կայուն խաղ է ցուցադրում թե՛ «Ուրալում» և թե՛ Հայաստանի ազգային հավաքականում: Նա ոչ միայն պաշտպանության, այլև մեր հավաքականի առաջատարներից է: Նրա որակները կարող են եղանակ փոխել խաղադաշտում: Հիշենք Մոնտենեգրոյի հետ հանդիպումը: Հարոյանը հիշարժան հաղթանակի գլխավոր հերոսներից մեկն էր: Հարոյանը մեր հավաքականի այն եզակի ֆուտբոլիստներից է, որը հաջողությամբ է պայքարում «երկրորդ հարկում»: Նրա գլխով խփած գոլը նպաստեց, որ մեր հավաքականը հաղթի այս տարվա վերջին՝ Կիպրոսի հետ ընկերական մրցավեճում: Նշենք, որ այս տարի Հարոյանը Իրանից տեղափոխվեց Ռուսաստանի Պրեմիեր լիգա, ինչը լուրջ առաջընթաց էր:
Մեր հավաքականի մյուս ֆուտբոլիստները 2017 թվականին տրանսֆերային հարթակում նկատելի տեղաշարժի չեն ենթարկվել: Լավագույն ֆուտբոլիստների երկրորդ օղակի եռյակը, ըստ «Առաջին լրատվական»-ի, եզրափակում է Հայաստանի ազգային հավաքականի և «ԲՄԱ-Խաբարովսկի» հարձակվող Ռուսլան Կորյանը: 2018 թվականի աշխարհի առաջնության ընտրական փուլում այս ֆուտբոլիստը գոլ է խփել Մոնտենեգրոյի և Դանիայի բավական ուժեղ հավաքականներին: Երևանյան խաղում Կասպեր Շմեյխելի դարպասը նրա խփած գնդակը լավագույններից էր ընթացիկ շրջափուլում: Հայաստանի հավաքականի կիսապաշտպանությունը ուժեղացնելու դեպքում Կորյանի գործողությունները, կարծում ենք, ավելի արդյունավետ կլինեն: Շատ դեպքերում այս հարձակվողը ստիպված է լինում նահանջել և գործել ավելի խորքից:
Ի տարբերություն մեր հավաքականի մյուս հարձակվողների՝ Ռուսլան Կորյանի գոլային հոտառությունը շատ ավելի ուժեղ է: 2018 թվականի աշխարհի առաջնության ընտրական փուլում Հայաստանի ազգային հավաքականը խփել է 10 գոլ: Այս 10 գնդակներից 8-ը հեղինակել են պաշտպաններն ու կիսապաշտպանները: Կորյանը մեր հավաքականի միակ հարձակվողն է, որին հաջողվել է աչքի ընկնել ավարտված ընտրական մրցաշարում: Այս տարվա նոյեմբերին Բելառուսի և Կիպրոսի հավաքականների հետ ընկերական հանդիպումներում մեր հավաքականին հաջողվեց խփել 7 գոլ: Այդ բոլոր 7 գոլերը ևս խփել են պաշտպաններն ու կիսապաշտպանները: Հետևաբար կարելի է ասել, որ Կորյանը Հայաստանի հավաքականում գոլ խփող միակ հարձակվողն է և արժանի է տեղ ունենալ լավագույն եռյակում:
