Հայաստանի Հանրապետության Ազգային ժողովում 2014 թ. պետբյուջեի նախագծում մարզային հատկացումների հոկտեմբերի 29-ի քննարկման ժամանակ մարզպետներին հարցեր ուղղողը հիմնականում ՀԱԿ պատգամավոր Նիկոլ Փաշինյանն էր: Վերջինս Լոռու մարզպետ Արթուր Նալբանդյանից փորձեց ճշտել՝ ինչու է Լոռու մարզն աղքատության ցուցանիշով երկրորդ տեղում ՀՀ մարզերի մեջ: Փաշինյանը նշեց, որ բյուջեի քննարկումների ժամանակ մշտապես նման իրավիճակների են հանդիպում, երբ մարզպետի հաշվետվություններից չեն կարողանում տեղեկատվություն ստանալ, թե ինչպիսի ազդեցություն է ունենալու բյուջեն մարզում աղքատության ցուցանիշի վրա:
«Դուք, որպես մարզպետ, ունե՞ք պատկերացում՝ ինչպե՞ս պետք է լուծել այս խնդիրը: Ինչպիսի՞ ծրագրեր եք իրականացնելու, որոնց արդյունքում կարձանագրվի գործազրկության և աղքատության նվազում»,- հետաքրքրվեց նա: Մարզպետը նշեց, որ աղքատության դեմ պայքարել այս ծրագրային բյուջեով հնարավոր չէ, բայց դա դեռ չի նշանակում, թե մարզպետարանը «ձեռքերը ծալած» նստելու է, հակառակը՝ անելու է հնարավորը՝ աղքատության ցուցանիշը նվազեցնելու համար: Նալբանդյանը տեղեկացրեց, որ իրենք կարևորել են զբոսաշրջության զարգացումը:
Արարատի նորանշանակ մարզպետ Արամայիս Գրիգորյանի հաշվետվությունից առաջ նիստը վարող ԲՀԿ-ական պատգամավոր Ստեփան Մարգարյանը զգուշացրեց՝ մարզպետը նոր է, շատ հարցերի չի տիրապետում, ուստի նրան շատ հարց պետք չէ տալ: Զգուշացումը, սակայն, Փաշինյանին չխանգարեց նրան ևս հարցեր ուղղելու, ինչին մարզպետը կատակով արձագանքեց. «Պարոն Փաշինյան, ասացինք չէ՞, ես նոր մարզպետ եմ»:
Պատգամավորին հետաքրքրում էր՝ 39.3 տոկոս աղքատության ցուցանիշ ունեցող մարզում, որը գտնվում է Արարատյան դաշտավայրում, որտեղ հողը բերրի է, գյուղացուն հողից եկամուտ ստանալու հնարավորություն է տալիս, ինչու՞ է աղքատության այդքան բարձր ցուցանիշ: «Նույն այդ մարզում կան գործարարներ, որոնք իրենց մրգի, բանջարեղենի վաճառքից միլիոնավոր դոլարների եկամուտներ են ստանում, ուստի, ինչու՞ այդ նույն հողը մշակող գյուղացին չի կարողանում գոնե 10-15 հազար դոլարի եկամուտ ստանալ»,- հարցրեց Փաշինյանը:
Ի պատասխան՝ մարզպետը նախ ընդգծեց, որ այլևս բիզնեսով չի զբաղվում, խնդրեց ֆիքսել դա, ապա նշեց, որ հողաբաշխման ժամանակ գյուղացիներից շատերը չեն կարողացել մեծ հողակտորներ ստանալ, ուստի նրանք, ովքեր մեծ հողակտորներ ունեն, ավելի մեծ շահույթ են կարողանում ստանալ, և դա բնական է:
