Ազգային ժողովի ՀԱԿ խմբակցության պատգամավոր Նիկոլ Փաշինյանը այսօր ԱԺ-ում Երևանի փոխքաղաքապետ Կամո Արեյանից հետաքրքրվեց՝ ինչո՞ւ բյուջետային միջոցները նպատակային չեն օգտագործվում՝ ասֆալտապատման պատճառով խցանումներ չստեղծելու, քաղաքացիներին անհարմարություններ չպատճառելու և սթրեսի չենթարկելու համար:
«Ինքս նման իրավիճակում եմ հայտնվել և ականատես եղել, թե ուսանողները, կանայք ինչպես են ժամերով կռացած մնում երթուղային տաքսիների մեջ։ Ինչո՞ւ բյուջետային միջոցները նպատակային չեն, որ մարդիկ սթրեսի չենթարկվեն, թե՞ ուզում եք բոլորը տեսնեն, որ ասֆալտ եք անում»,- ասաց նա։
Արեյանը հայտնեց, որ լայնածավալ աշխատանքներ են իրականացվել, ինչն էլ ենթադրվում էր, որ լուրջ ծանրաբեռնվածություն կլինի։ Նա նշեց, որ քաղաքապետարանի կողմից արվել է առավելագույնը՝ առանց ավելորդ անհարմարություններ ստեղծելու աշխատանքներն իրականացնելու համար, առավելագույնս փորձել են օգտագործել գիշերվա ժամերը և շաբաթ-կիրակի օրերը։
«Իրոք, դժգոհություններ եղել են ծայրամասերում, բայց այդ մարդիկ գիտակցել են, որ ի շահ քաղաքի է դա»,- նշեց նա։
Փաշինյանին հետաքրքրում էր նաև, թե ինչու է ձգձգվում Մաշտոցի պողոտայում Կարեն Դեմիրճյանի արձանի տեղադրումը: Նա հիշեցրեց՝ օրեր առաջ Հոկտեմբերի 27-ի զոհերի 14-րդ տարելիցն էր նշվում, իսկ արձանը այդպես էլ չկա ու չկա։ «Ինչո՞ւ այս աշխատանքը չի կատարվում, էդ ի՞նչ դժվար բան է»,- հարց ուղղեց նա։
Փոխքաղաքապետը նշեց, որ արձանի տեղադրման հարցում մեղքն իրենցը չէ։ «Այդ հարցում՝ բացի ընդառաջելուց, քաղաքապետարանը որևէ խոչընդոտ և բյուրոկրատական քաշքշուկ չի ստեղծել: Արձանը հենց պատրաստ լինի, մենք արագ և նախատեսված ձևով կներկայացնենք»,- ասաց նա։
ՀԱԿ պատգամավորը փորձեց նաև պարզել՝ քանի մարդ է գործազուրկ դարձել ավտոկայանատեղիների հետ կապված վերջին փոփոխությունների հետևանքով, ինչին Արեյանը պատասխանեց, որ ավտոկայանատեղիներում աշխատողների գերակշիռ մասը, ինչպես և արդեն ասել են, ապօրինի են գործել։