ՀՀ վարչապետ Կարեն Կարապետյանի գլխավորությամբ դեկտեմբերի 4-ին կառավարությունում տեղի է ունեցել կոռուպցիայի դեմ պայքարի խորհրդի նիստ՝ քաղաքացիական հասարակության ներկայացուցիչների մասնակցությամբ:
«Իրավաբանների հայկական ասոցիացիա» ՀԿ նախագահ Կարեն Զադոյանը «Առաջին լրատվական»-ի հետ զրույցում ներկայացրեց նիստի ընթացքում քննարկված հարցերը։
Մեր զրուցակիցը նշում է՝ հանրությունն ուզում է ռեալ փոփոխություններ զգալ հակակոռուպցիոն խորհրդի գործունեությունից և վարչապետի հանձնարարականներից։ Դիտարկմանը՝ արդյո՞ք կա վստահություն, որ համակարգը կարող է կոռուպցիայի դեմ պայքարել, Կարեն Զադոյանն արձագանքեց. «Կոնկրետ կոռուպցիայի դեմ պայքարի խորհուրդը հարթակ է, որտեղ մտքեր, գաղափարներ, առաջարկություններ պետք է հնչեն, քննարկվեն։ Խորհուրդը որևէ լիազորություն չունի գործունեություն իրականացնել, և խորհրդի որոշումները չեն կարող պարտադիր լինել պետական մարմինների համար։ Խորհրդի որոշումները ի կատար են ածվում վարչապետի տված հանձնարարականների, վարչապետի որոշումների միջոցով։ Այս առումով՝ խորհրդից մեծ սպասելիքներ ունենալը ճիշտ չէ, հանրությանը պետք է ճիշտ բացատրել, թե այս խորհրդի դերը որն է»։
Հետաքրքրվեցինք նաև՝ արդյո՞ք խորհրդի նիստերին մասնակցությամբ կառավարության գործունեությունն այս հարթակում չի լեգիտիմացվի։ «Մենք արդեն շուրջ 1․5 տարի է՝ մասնակցում ենք և մեր մասնակցության արդյունքում քրեականացվել է ապօրինի հարստացումը Հայաստանում, ստեղծվել է հակակոռուպցիոն անկախ կանխարգելման մարմին, ընդունվել է ազդարարման համակարգի մասին օրենքը, շուտով կստեղծվի և կգործարկվի անանուն ազդարարման համակարգը, կատարվել են մի շարք ռեֆորմներ։ Եթե մենք դրսում լինեինք՝ այդ ռեֆորմները չէին կատարվի։ Մենք կարողացել ենք օրակարգ առաջարկել և դա ընդունվել է կառավարության կողմից։ Կարծում եմ՝ այս գործելաոճով կունենանք լուրջ արդյունքներ»,- եզրափակեց նա։
Հարցազրույցն ամբողջությամբ՝ տեսանյութում։
