Ավան և Նոր Նորք վարչական շրջանների ընդհանուր իրավասության դատարանում Մեսրոպ Մակյանի նախագահությամբ շարունակվում է «Սասնա ծռեր» 11 անդամի գործով դատական նիստը:
Սեդրակ Նազարյանը հանդես եկավ հայտարարությամբ. «Դուք էլ գիտեք, Հայաստանի հայերն էլ գիտեն, աշխարհի հայերն էլ գիտեն, որ դատավորը իրավական պետության մեջ նշանակվում է նախագահի կողմից։ Բայց, եթե նախագահը չի ընտրվում, ուրեմն նրա նշանակած դատավորը ապօրինի է։ Դուք այստեղ ոտնահարում եք մեր իրավունքները։ Լինելով ապօրինի՝ մեզ ինչ-որ բաներ եք թելադրում, Մակեյան ջան։ Այսպես արեք, այնպես արեք։ Բայց դուք մի հատ ձեզ հարց տվեք, ով՞ եք դուք, որ մեզ հրամաններ եք տալիս։
Որպես հայ մարդ, էստեղ վիրավորական արտահայտություններ են հնչում դատախազների հասցեին։
Ի սկզբանե, մենք էս պայքարը սկսել ենք չէ՞, դե բնական է չէ՞, մենք մեր կյանքն ենք դրել էստեղ, չէ՞։ Ու էս ամեն ինչը դուք ուզում եք վերածեք չգիտեմ ինչի։ Հա, դե հոդված եք դրել, զենք ենք ապօրինի կերպով ձեռք բերել։ Բա, որ զենք ենք ապօրինի ձևով ձեռք բերել, բա պարզեք, թե որտեղից ենք ձեռք բերել։ Բա 20․000 ոստիկան ունեք, էդ էլ չեք կարողանում՞ պարզել։ Բա ինչու՞ չեք կարողանում պարզեք, որովհետև ձեզ չի հետաքրքում, չէ՞։ Հիմա եկել եք էստեղ որպես դատավոր, մեկ էլ դատախազները, ստանձնել եք ծաղրածուի դեր ու ընդամենը զբաղեցնում եք ժողովրդին։ Մակեյան ջան, դու անօրինական ես այստեղ նստած։ Իսկ, եթե ամեն ինչ ապօրինի է, ուրեմն խոսել մեղադրականից կամ ինչ-ինչից, ասում եմ ծաղրածուի դեր է, ընդամենը ժամանակ ձգելու համար։ Լավ ենք արել, ինչ արել ենք, էլի ենք անելու»,-նշեց Նազարյանը։
