Կառավարությունը պարտավոր է կատարել Սահմանադրության պահանջները՝ առաջնորդվի Սահմանադրությամբ և Վանաձորում նոր ընտրություններ նշանակի։ Այդ մասին «Առաջին լրատվական»-ի հետ զրույցում նշել է «Ելք» խմբակցության պատգամավոր Արտակ Զեյնալյանը՝ անդրադառնալով փաստին, որ «Լուսավոր Հայաստան» կուսակցությունը դիմել է կառավարությանը՝ Վանաձորի ավագանին լուծարելու և նոր ընտրություններ նշանակելու պահանջով՝ հիմք ընդունելով ՍԴ հայտնի որոշումը։
«Այլապես, կհաստատվի, որ երկրում կա սահմանադրական ճգնաժամ։ Պետք է հարգել Սահմանադրությունը և արժանապատիվ ձևով ընդունել պարտությունը։ Մենք թշնամիներ չենք, ակադեմիական օպոնենտություն ենք արել և հաղթել ենք։ Պետք է հարգել մեր հաղթանակը։ Ժողովրդավարական երկիրն այն է, որտեղ քաղաքական փոքրամասնությունը կարող է հասնել հաջողության և պարտադրել վարքագծի կանոններ մեծամասնության համար»,- ընդգծեց Զեյնալյանը։
