«Գյուլնազ տատի հեքիաթները պատմում են նրանք, ովքեր իրենց շարժումը տանում են ջախջախման: Ես, սկսած 97թ.-ից, անալիզներ, կանխատեսումներ եմ արել շարժումների վերաբերյալ. իմ կանխատեսումները 100 տոկոս ճիշտ են եղել։ Եթե ես հեքիաթ պատմող լինեի, ինձ չէին հրավիրի Նախախորհրդարանի նիստերին մասնակցելու, ինձ ելույթի հնարավորություն չէին տա, հետո դրանից հետո չէին զանգահարի ու համոզի, որ գնամ դառնամ Նախախորհրդարանի անդամ»,- «Առաջին լրատվական»-ի հետ զրույցում ասաց քաղաքական վերլուծաբան Արծրուն Պեպանյանը՝ անդրադառնալով «Հիմնադիր խորհրդարանի» նախագահ Գարեգին Չուքասզյանի գրառմանը, թե Արծրուն Պեպանյանը Գյուլնազ տատի հեքիաթներ է պատմում, էժան կերպով մոլորեցնում է ընթերցողներին։ Գարեգեն Չուքասզյանը նման գրառում էր կատարել Արծրուն Պեպանյանի հարցազրույցներից մեկից հետո, որում վերլուծաբանը մատնանշում էր, թե իր կարծիքով՝ որտեղ է սխալվել Ժիրայր Սեֆիլյանը։
«Ասում եմ՝ ուժերի հարաբերակցությունը այնպիսին է, որ դուք չեք կարող գնալ և ուժով հեռացնել իշխանություններին, և կյանքն էլ է դա ապացուցում: Դրա փոխարեն առաջարկում եմ՝ եկեք փոխեք մարտավարությունը, և գտնենք լուծումներ, այս համակարգի տեսանկյունից նայելով ասել եմ, որ վրիպումներ կան, և եթե գտնում են, որ վրիպումներ չկան, թող փաստերով ապացուցեն։ Սա ոչ այնքան իմ ու Նախախորհրդարանի վեճի առարկան է, այլ քաղաքական մտքի. եթե դուրս գանք և մարդկանց հարցնենք՝ ինչ անենք այս իրավիճակից դուրս գալու համար, ոչ ոք պատասխան չունի, պիտի վերլուծենք մեր բոլոր շարժումները, հասկանանք՝ որտեղ թերացանք, մշակենք նոր մարտավարություն, երկիրը դուրս բերենք այս իրավիճակից: Նախախորհրդարանի դեմ ոչինչ չունեմ, վերլուծաբան եմ՝ իմ տեսակետը արտահայտել եմ»,- շեշտեց նա։
Արծրուն Պեպանյանը ընդգծեց՝ իրեն մեղադրում են այն բանում, թե «իբր ես ասել եմ, որ ներկա իշխանությունն ազգային է, հարկավոր էր համագործակցել նրա հետ, և Սեֆիլյանին էլ մեղադրանք եմ ներկայացնում այդ համագործակցությունը չանելու համար, ինչը այդպես չէ»: Պեպանյանի խոսքով՝ ինքը ասել է, իրականության վերափոխման տանող նախաձեռնության շահերից ելնելով, ռացիոնալ հարաբերություններ հաստատել իշխանությունների հետ։ Ռացիոնալ հարաբերություններ հաստատելը համագործակցելը չէ, ինչը ենթադրում է, որ թշնամի չհռչակել իշխանություններին, քանի որ չկա հնարավորություն նրան ուժով հեռացնելու։ Ընդհակառակը՝ այնպիսի քայլեր իրականացնել, որ իշխանությունները հնարավորինս չվնասեն վերափոխիչ նախաձեռնությանը՝ «Պահպանողական հեղափոխությանը»։
Արծրուն Պեպանյանը ընդգծում է, որ իր տեսակետները սվիններով են ընդունում, հարձակվում են, բայց հակառակը չեն կարողանում ապացուցել, Չուքասզյանին էլ չի հաջողվել հակադարձել։
Մանրամասները՝ տեսանյութում:
