«Հայաստան-ԵՄ. Համապարփակ և ընդլայնված գործընկերություն» թեմայով խորհրդարանական լսումներին ծավալուն ելույթով հանդես եկավ ՀՀ Արտաքին գործերի նախարարի տեղակալ Կարեն Նազարյանը`արտգործնախարարի անունից շնորհակալություն հայտնելով նմանօրինակ քննարկում կազմակերպելու համար:
«ԵՄ-ն մեր քաղաքական և առևտրական գործընկերներից մեկըն է, և մեր հարաբերությունների օրացույցը շարունակում է մնալ բավականին հագեցած: Անցնող ժամանակաշրջանը Հայաստան-ԵՄ հարաբերություններում նշանավորվել է Բրյուսելի և եվրոպական մյուս մայրաքաղաքների հետ ինտենսիվ փոխգործակցությամբ, երկկողմ բարձրաստիճան այցերի, քաղաքական խորհրդակցությունների, աշխատանքային հանդիպումների ընթացքում որպես հիմնական խնդիր մշտապես առանձնացվել է նոր շրջանակային համաձայնագրի թեման: Այդ քննարկումները զուգորդվել են համապարփակ և ընդլայնված գործընկերության մասին համաձայնագրի բանակցային գործընթացով, որը ավարտին հասցվեց այս տարվա փետրվարին, և այդ մասին, ինչպես հիշում եք, հայտարարվեց ՀՀ ԵՄ խորհրդի նախագահների կողմից, ավելի ուշ ՝ մարտին Երևանում նախաստորագրվեցին տեքստերը, որից հետո կողմերը ձեռնամուխ եղան փաստաթղթի տևական զննման աշխատանքներին»,-ասաց Նազարյանը: