Երևանի քաղաքապետարանում կայացած աշխատանքային հերթական խորհրդակցության ժամանակ քաղաքապետի տեղակալ Վահե Նիկոյանը զեկուցել է, որ ի կատարումն քաղաքապետ Տարոն Մարգարյանի հանձնարարկանի` գույքահարկի հավաքագրման գործընթացն առավել արդյունավետ կազմակերպելու նպատակով Երևանի քաղաքապետարանի աշխատակազմի եկամուտների հաշվառման և գանձման վարչության, վարչական շրջանների աշխատակազմերի եկամուտների հաշվառման և հավաքագրման բաժինների, ինչպես նաև վերոնշյալ գերատեսչական շենքերում գործող վճարահաշվարկային կետերի աշխատանքը երկարացվել է մինչև ժամը 19:00-ն։ Առաջարկվել է սույն աշխատանքային ռեժիմը պահպանել մինչև դեկտեմբերի 10-ը ներառյալ: Հանձնարարվել է գործընթացը պահել ամենօրյա հսկողության ներքո՝ ապահովելով քաղաքացիների պատշաճ սպասարկումը:
Զեկուցվել է, որ վարչական շրջաններում շարունակվում են ձմռան նախապատրաստական աշխատանքները, որոնց շրջանակում վերացվում են բազմաբնակարան բնակելի շենքերում նախապես գույքագրված խնդիրները։
Խորհրդակցության ընթացքում զեկուցվել է, որ շարունակվում է ամենօրյա հսկողությունը` մայրաքաղաքում ապօրինի շինարարությունների և հողազավթումների կանխման, բացօթյա ապօրինի առևտրի կանխարգելման, չնախատեսված վայրերում աղբ թափելու դեպքերը հայտնաբերելու նպատակով:
Ի կատարումն քաղաքապետի հանձնարարականի` խստացվել է նաև հսկողությունը 18 տարին չլրացած անձանց ծխախոտի և ոգելից խմիչքների վաճառքն արգելելու, ինչպես նաև նրանց մուտքը զվարճանքի օբյեկտներ և ակումբներ արգելելու ուղղությամբ։ Պատասխանատուներին և վարչական շրջանների ղեկավարներին հանձնարարվել է բոլոր ուղղություններով շարունակել հետևողական աշխատանքը՝ անհրաժեշտության դեպքում համագործակցելով ոստիկանության Երևան քաղաքի վարչության հետ։
Ամանորին ընդառաջ կազմակերպվող նախապատրաստական աշխատանքների հետ կապված զեկուցվել է, որ աշխատանքներ են տարվում մասնավորապես սոցիալապես անապահով ընտանիքներին պարենային փաթեթների, ինչպես նաև երեխաների համար նվեր-փաթեթների տրամադրման գործընթացը պատշաճ մակարդակով կազմակերպելու ուղղությամբ։ Միաժամանակ, ՀՀ մշակույթի նախարարության և մասնավոր ընկերությունների հետ համատեղ ձեռնարկվում են անհրաժեշտ միջոցներ՝ Ամանորի տոնական օրերին մայրաքաղաքում գործող սպասարկման և ժամանցի օբյեկտների աշխատանքը կազմակերպելու, ինչպես նաև թանգարանների համար աշխատանքային հատուկ ժամանակացույց սահմանելու նպատակով:
Աշխատակազմի տուրիզմի բաժնի պետի փոխանցմամբ էլ Ամանորի տոնական օրերին «Երևան Սիթի Տուր» զբոսաշրջային երթուղու գործարկման նպատակով արդեն իսկ մշակված է տոնական ուղերթը, որը կներառվի «Նոր տարին Երևանում 2018» միջոցառումների ծրագրում։
