Իրանի ԱԳՆ մամլո քարտուղար Մարզեհ Աֆհամը երկրում մարդու իրավունքների մասին ՄԱԿ-ի վերջին զեկույցն անվանել է «անարդար և քաղաքականացված»՝ հաղորդում է IRNA գործակալությունը:
Նրա խոսքերով՝ Իրանը չի ընդունում երկրում մարդու իրավունքների հարցերով նշանակված հատուկ զեկուցողին՝ դա համարելով վիրավորական: Աֆհանը նշել է, որ այդ զեկույցը գրվել է ծայրահեղական և ահաբեկչական խմբավորումների տեղեկատվության հիման վրա:
«Զեկույցում իրավաբանորեն հաստատված որևէ տեղեկատվություն չկա»,- ասել է նա՝ հավելելով, որ տարածաշրջանում, որը տանջվում է ծայրահեղականությունից, ահաբեկչությունից և բռնությունից, Իրանը կայունության առանցք է:
Աֆհամի խոսքերով՝ Իրանի վարչակազմը կառուցողական կերպով համագործակցում է միջազգային հանրության հետ՝ կրոնական ժողովրդավարության, չափավորության և պատասխանատվության հիմքով:
Հիշեցնենք, որ Իրանում մարդու իրավունքների մասին նոր զեկույցը, որը չորեքշաբթի ներկայացրել է ՄԱԿ-ը, այդ երկրի կառավարության դեմ առաջադրել է հերթական հավակնությունների շարքը, այդ թվում՝ խնամակալների և որդեգրված երեխաների միջև ամուսնության օրինականացված իրավունքի առնչությամբ: