Մեծ Բրիտանիայի բնակչուհի Քիրսթի Մաունսին հանուն սիրո գիրացել է ավելի քան 100 կիլոգրամով: Բանն այն է, որ նրա ընկերոջը՝ Ալեքսին, միշտ գիրուկ աղջիկներ են դուր եկել, հայտնում է The Sun-ը:
23-ամյա Մաունսին միշտ սիրել է լավ ուտել: 11 տարեկանում նա կշռել է 95 կգ, բայց աշխատել է ուշադրություն չդարձնել վիրավորական ածականներին, որ իրեն տվել են հասակակիցները: Նա ջանասիրաբար ձևացրել է, թե իրեն սիրում է այնպիսին, ինչպիսին կա: Սակայն ներքուստ եղել է ապերջանիկ և անինքնավստահ: Ամեն ինչ փոխվել է, երբ 2012 թ. Քիրսթին համացանցում ծանոթացել է Ալեքս անունով երիտասարդի հետ: «Ես 10 տարով փոքր էի նրանից, բայց նա, միևնույն է, ինձ շատ դուր եկավ: Ալեքսը չէր ուզում, որ ես նիհարեմ: Այդ ժամանակ ես մտածեցի, որ այլևս ստիպված չեմ լինի տառապել ավելորդ քաշի պատճառով, չէ՞ որ վերջապես գտնվել էր տղամարդ, ով սիրում էր ինձ այդպիսին: Ես մոռացա ամեն տեսակ դիետաների մասին և սկսեցի ավելի շատ ուտել, միայն թե սիրելիս երջանիկ լիներ: Ալեքսի շնորհիվ՝ ես հասկացա, որ գեղեցիկ եմ և ինքնավստահ դարձա: Մեր հարաբերությունների առաջին երկու տարիներին ես գիրացա մոտ 110 կիլոգրամով»,- ասել է Մաունսին The Sun-ին: Ռոմանտիկ հանդիպումները զույգն անցակցրել է արագ սննդի ռեստորաններում՝ պիցցայի և բուրգերների հետ քաղցր գազավորված ըմպելիքներ խմելով: Երբ Քիրսթիի չափերը դուրս են եկել պլյուս-սայզի սահմաններից, սիրելիի հորդորով նա որոշել է մասնակցել գեր կանանց գեղեցկության մրցույթի: Սակայն նույնիսկ ուրիշ գիրուկ մասնակիցների ֆոնին նա շատ գեր է երևացել, նրան ծաղրել են:
Դրանից հետո Քիրսթին նաև առողջական լուրջ խնդիրներ է ունեցել: Նա տառապել է զարկերակային բարձր ճնշման պատճառով, չի կարողացել ինքնուրույն բարձրանալ աստիճաններով և նույնիսկ հագնվել: Ի վերջո, աղջիկը ստամոքսի փոքրացման վիրահատության է դիմել: Այդ ամբողջ ընթացքում Ալեքսը նրան աջակցել է: Վիրահատությունից հետո նա սկսել է արագորեն նիհարել, երիտասարդը կորցրել է հետաքրքրությունը նրա հանդեպ: Անցած տարվա փետրվարին զույգը վերջնականապես բաժանվել է:
Հիմա Քիրսթին 96 կգ է կշռում, մտադիր է էլի նիհարել: Նա պնդում է, որ հիմա իրեն այլ տղաներ են ուշադրություն դարձնում, ուստի չի կասկածում, որ դեռ կհանդիպի իր սիրուն:
