Իսլամաբադը մի քանի տարիների ընթացքում գաղտնի աջակցել է Պակիստանի տարածքում ահաբեկչության դեմ պայքարի շրջանակում ամերիկյան անօդաչու թռչող սարքերի կիրառմանը, չնայած հրապարակավ հանդես է եկել այդ ծրագրի դեմ: Այս մասին հայտնում է The Washington Post-ը՝ հղում անելով իր տրամադրության տակ հայտնված ԿՀՎ գաղտնի փաստաթղթերին և պակիստանցի դիվանագետների զեկուցագրերին:
Փաստաթղթերը տեղեկություն են պարունակում մարտական անօդաչու թռչող սարքերի կիրառմամբ մի քանի տասնյակ գործողությունների մասին՝ գրում է պարբերականը: Դրանք ներառում են քարտեզներ և օբյեկտների լուսանկարներ՝ հարվածից առաջ ու հետո: Այդ փաստաղթղթերը վերաբերում են 2007-2011 թվականներին: Փաստաթղթերի վրա արված նշումները վկայում են, որ դրանք պատրաստել են ԿՀՎ հակաահաբեկչական կենտրոնի կողմից պակիստանյան կառավարությանը փոխանցելու համար:
Պարբերականը գրում է նաև, որ հանրապետության կառավարությունում բարձրաստիճան անձանց համար կազմակերպվել են հատուկ փակ բրիֆինգներ, որոնց ժամանակ նրանց տեղեկացրել են անօդաչուների կիրառմամբ այս կամ այն գործողության անցկացման արդյունքների մասին:
Տեղեկության հայտնվելը պարբերականում համընկնել է Պակիստանի վարչապետ Նավազ Շարիֆի ԱՄՆ այցին, ինչը հազիվ թե հնարավոր լինի պատահականություն համարել: Չորեքշաբթի Պակիստանի կառավարության ղեկավարը Սպիտակ տանը հանդիպել է Օբամայի հետ:
Հաստատելով Իսլամաբադի պատրաստակամությունը՝ ամրապնդելու համագործակցությունը ահաբեկչության դեմ պայքարի ոլորտում, Շարիֆը հայտարարել է, որ ԱՄՆ-ը պետք է դադարեցնի անօդաչուների կիրառումը Պակիստանում:
Օբաման իր հերթին հայտարարել է, որ կողմերը պայմանավորվել են շարունակել միմյանց հետ կառուցողական փոխգործակցության ուղիների որոնումը, որոնք թույլ կտան պահպանել Պակիստանի ինքնիշխանությունը և հաշվի առնել երկու երկրների անհանգստությունը:
Ամերիկյան վարչակազմի ղեկավարի խոսքով՝ երկու պետությունների միջև լարվածության աղբյուր լինելու փոխարեն՝ հակաահաբեկչական գործունեությունը պետք է դառնա ուժի աղբյուր:
