ԱԻՄ առաջնորդ Պարույր Հայրիկյանը մտադիր է երկուշաբթի օրը հացադուլ սկսել ԿԸՀ-ի դիմաց։ «Առաջին լրատվական»-ի հետ զրույցում Պարույր Հայրիկյանը ասաց, որ իրենք նախատեսում էին ստորագրահավաք սկսել Սահմանադրությունը փոփոխելու նպատակով, սակայն ԿԸՀ-ից բացասական պատասխան են տվել։
«Սահմանադրությունը հիմքերի հիմքն է որևէ ոլորտում, որևէ բան կատարելուց առաջ շատ կարևոր է, որ գործողությունները նախանշված են և ինչ-որ տեղ սահմանափակված Սահմանադրությամբ։ Այդ նպատակով մենք նաև այլընտրանք էինք ներկայացրել, որից վախեցան և գնացին մի ճանապարհով, որը պետական գործունեության մեջ ընդհանրապես գոյություն չունի, բացառված է։
Մենք դիմել էինք նոր Սահմանադրությամբ 200 հազար ստորագրություն հավաքելու իրավունքից օգտվելու համար, քանի որ ներկա Սահմանադրությամբ նախատեսվում է, որ 200 հազար ստորագրությամբ դու կարող ես հանդես գալ նախաձեռնությամբ, բայց մենք ԿԸՀ-ից պատասխան ստացանք, որ օրենքը չի նախատեսում նման բան։ Ստացվում է, որ ԿԸՀ-ի համար նախ հանրաքվեն չի կայացել, և նոր Սահմանադրությունը չի գործում»,- շեշտեց նա։
