Հոկտեմբերի 27-ին Վրաստանում նախագահական ընտրություններ են: Տեղի քաղաքագետները կանխատեսում են երկրորդ փուլ՝ հիմնական թեկնածուների թվում նշելով երեք թեկնածուի անուն՝ Գեորգի Մարգվելաշվիլի (իշխող «Վրացական երազանք» կոալիցիայից), Դավիթ Բաքրաձե (նախագահական «Միացյալ ազգային շարժում» կուսակցությունից) և Նինո Բուրջանաձե («Դեմոկրատական շարժում-Միացյալ Վրաստան» կուսակցությունից):
ԿԸՀ-ում գրանցված է 23 թեկնածու՝ ռեկորդային թիվ Վրաստանի ընտրությունների ողջ պատմության մեջ: Այս մասին հայտնում է RIA Novosti-ն:
Ընտրողների մասնակցությունը խոստանում է բարձր լինել: Սոցհարցումների տվյալներով՝ հարցվածների մոտ 78 տոկոսը մտադիր է մասնակցել ընտրություններին, 14 տոկոսը՝ ոչ, իսկ 4 տոկոսը դեռևս չի կողմնորոշվել: Սոցհարցումների տվյալներով՝ թեկնածուներից ոչ մեկը 50 տոկոսից ավելի ձայն չի հավաքի: Առաջատարը համարվում է Մարգվելաշվիլին, ում օգտին պատրաստ է քվեարկել հարցվածների 47 տոկոսը: Երկրորդում Բաքրաձեն է, ում օգտին իր ձայնը կտա ընտրողների 15 տոկոսը: Եռյակը եզրափակում է Բուրջանաձեն՝ 12 տոկոսի աջակցությամբ:
Իշխող կոալիցիայի առաջնորդ, վարչապետ Բիձինա Իվանիշվիլին, այնուհետև նաև Մարգվելաշվիլին հաղթանակի հույս են հայտնել հենց առաջին փուլում: Եթե ընտրողների բավարար թվով աջակցություն չստանա, Մարգվելաշվիլին չի մասնակցի երկրորդ փուլին: Իվանիշվիլիի խոսքով՝ ձայների 60 տոկոսից պակաս արդյունքը Մարգվելաշվիլիի համար վիրավորական կլինի: