Իրանում մարդու իրավունքների մասին նոր զեկույցը, որը չորեքշաբթի ներկայացրել է ՄԱԿ-ը, այդ երկրի կառավարության դեմ առաջադրել է հերթական հավակնությունների շարքը, այդ թվում՝ խնամակալների և որդեգրված երեխաների միջև ամուսնության օրինականացված իրավունքի առնչությամբ: Այս մասին հայտնում է RIA Novosti-ն:
«Ես խորապես անհանգստացած եմ վերջերս կատարված օրենսդրական քայլերի առնչությամբ»,- իր զեկույցը ներկայացնելիս հայտարարել է Իրանում մարդու իրավունքների հարցերով ՄԱԿ-ի հատուկ զեկուցող Ահմեդ Շահիդը: «Լրագրողների վիճակը հատուկ անհանգստություն է առաջացնում»,- ասել է Շահիդը: Նրա տվյալներով՝ մոտ 600 իրանցի լրագրողներ հայտնվել են «հակապետական ցանցի» սև ցուցակում, նրանցից 15-ը ձերբակալվել են:
Ինչպես նշել է զեկուցողը, Իրանում մեկ տարում փակվել են 67 ինտերնետ-սրճարաններ, արգելափակվել է մոտ 5 մլն կայքերի հասանելիությունը:
Զեկուցողը, ով իր զեկույցը կազմել է մասնավորապես 137 հարցազրույցների հիման վրա, նշել է, որ 2012-ի հունվարից 2013-ի հունիս ընկած ժամանակահավածում Իրանում մահապատժի է ենթարկվել 724 մարդ, որոնց մի մասը՝ հրապարակավ:
Իր հերթին ՄԱԿ-ում Իրանի առաքելության ներկայացուցիչը հայտնել է, որ իր կառավարությունը չի էլ հաստատում, որ երկրում մարդու իրավունքներին առնչվող վիճակը կատարյալ է: Նա հիշեցրել է իրենց կոշտ դիրքորոշման մասին առ այն, որ այդ զեկույցն իրենից ներկայացնում է «ոչ օբյեկտիվ և անարդյունավետ» գործունեության արդյունք: Նրա խոսքով՝ այդ գործունեությունը նախաձեռնել են Իրանի նկատմամբ հատուկ քաղաքական հավակնություններ ունեցող մի խումբ երկրներ: Նա ընդգծել է, որ Իրանը, հատկապես Հասան Ռուհանիի ընտրվելուց հետո, շեշտը դրել է երկրում և երկրի սահմաններից դուրս մարդու բոլոր իրավունքների պաշտպանության անսասան վճռականության վրա: