«Մենք քաղաքացիական պայքարի փորձ ունենք։ Ունենք և՛ հաջողություն գրանցած պայքարներ, և՛ ձախողված։ Նոր պայքար, շարժում սկսելիս պետք է դաս քաղել նախկին պայքարների սխալներից, նախորդ սխալների վրա պետք է սովորել»,- «Առաջին լրատվական»-ի հետ զրույցում ասաց «Էլեկտրիկ Երևան» շարժման կազմակերպիչ ակտիվիստներից Մաքսիմ Սարգսյանը՝ անդրադառնալով տարկետման իրավունքի պահպանմանն ուղղված ուսանողների ակցիաներին։
Նրա խոսքով՝ պաշտոնյաների հետ հանդիպումների գնալը սխալ քայլ է ու ոչ մի տեղ չտանող ճանապարհ։ «Սկզբում մերժեցին պաշտպանության նախարարի հրավերը, հետո գնացին ԿԳ նախարարի հետ հանդիպեցին, հետո վարչապետի ու նույն նախարարների։ Երևույթը նույնն է։ Մենք, օրինակ, բազմիցս ասել ենք, որ երբ կա հստակ ձևավորված պահանջ, պաշտոնյաների հետ հանդիպումները ոչ մի տեղ չտանող գործընթացներ են։ Պաշտոնյաների կաբինետներում նրանք ներկայացնում են իրենց առարկությունները, իրենց խոսքով հերթական անգամ տպավորություն են ստեղծում, որ պայքարը սխալ է, ինչ-որ տեղ ճնշում են գործադրում իրենց այդ պահվածքով։ Մենք քաղաքացիական պայքարի տարբեր օրինակներ ունենք, թե որոնց ժամանակ պաշտոնյաների հետ հանդիպումները հետագայում ինչով են ավարտվել։ Իսկ ունենք օրինակ, երբ նման կոչերն անտեսվել են, փողոցային ակտիվ պայքարը, ճնշումն այնքան է ուժեղացել, որ արդյունքի ենք հասել»,- նշեց ակտիվիստը։
Մաքսիմ Սարգսյանի խոսքով՝ այո, տարկետում պետք է լինի, և պետք է լինեն մարդիկ, ովքեր պետք է գիտությամբ զբաղվեն։ «Հակառակ պարագայում բավական լուրջ խնդիրներ կունենանք։ Պարզապես տարկետման իրավունքը պետք է ճիշտ օգտագործել, որ պաշտոնյաների, օլիգարխների շփացած լակոտները չկարողանան այդ ճանապարհով ազատվել բանակից։ Բայց հիմա մենք այդ խնդիրը վերացնելու համար լուրջ, խելացի, գիտության մեջ խորացած երիտասարդներին զրկում ենք գիտությամբ զբաղվելու հնարավորությունից»,- ասաց ակտիվիստը։
Մաքսիմ Սարգսյանի խոսքով՝ անհնարին պահանջներ, հարցեր չկան։ Պարզապես պետք է պայքարի ճիշտ մեխանիզմներ ու ճիշտ գործիքներ ընտրել։ «Նույնն էլ այս դեպքում է։ Եթե պահանջը ճիշտ է, ճիշտ ձևակերպված է, ապա պետք է գնալ մինչև վերջ։ Քաղաքացիական անհնազանդության մեխանիզմները շատ են՝ փողոցներ փակել, անհնազանդության քայլերի դիմել, բայց նրանք դեռ այս գործիքներից չեն օգտվում»։
Որպես որոշակի առումով հաջողություն գրանցած շարժման ակտիվիստ՝ Մաքսիմ Սարգսյանը ուսանողներին հորդորում է չլսել ոչ մեկին, ոչ մեկի ազդեցության տակ չընկնել, չուղղորդվել ինչ-որ մեկի կողմից։ Պետք է բաց հանրային քննարկումներ կազմակերպել, լսել հենց ցույցի մասնակիցներին, խնդրի լուծման նրանց ուղիները և անցնել առաջ։