Այն մարդիկ, որոնք մասնակցեցին «Հանուն Հայաստան պետության» ճակատի հռչակագրի փաստաթղթի մշակմանը, չնչին բացառություններով բոլորն էլ ստորագրել են փաստաթղթի տակ։ Այդ մասին «Առաջին լրատվական»-ի հետ զրույցում նշել է ՀՀՇ վարչության անդամ, ԱԺ նախկին փոխնախագահ Կարապետ Ռուբինյանը, որը ևս ստորագրել է փաստաթղթի տակ։
Անդրադառնալով փաստաթղթի ստորագրմանը նախորդած բուռն քննարկմանը, որտեղ լուրջ բախում է եղել՝ մի կողմից իր և Ալբերտ Բաղդասարյանի, մյուս կողմից՝ Հմայակ Հովհաննիսյանի միջև, Կարապետ Ռուբինյանն ասաց. «Իմ և Ալբերտ Բաղդասարյանի միջև որևէ բանավեճ չի եղել, մենք համախոհներ ենք այդ հարցերում։ Ինչ վերաբերում է Հմայակ Հովհաննիսյանին, ապա էլի որևէ բանավեճ տեղի չի ունեցել։ Տեղի է ունեցել բանսարկություն, որը բացահայտվել է իմ կողմից, որի արդյունքում նա ինչ-ինչ պատճառաբանություններ բերելով, պարզապես հրաժարվեց ստորագրել փաստաթուղթը։
Դա առնչվում էր պարոն Հմայակի՝ հայտնի տխրահռչակ «Գրիբոյեդովի» ակումբի անդամ լինելուն։ Ես հենց առաջին նիստում շոշափեցի Վահրամ Մարտիրոսյանի հետ կապված միջադեպը և ստացա նրանից հավաստիացումներ, որ այդ ակումբը չի գործում, որ իր կողմից որևէ անդամություն երբևիցե չի եղել, իր մասնակցությունն այդ ակումբում զուտ բանավեճային է համարում և այլն։ Ոչ մի խոսք այն մասին, թե ինքն էլ իր կողմից խնդիրներ ունի նախկին ՀՀՇ-ականների հետ, ինչպես ինքն է հետո արտահայտվել։ Հետո պատահաբար Facebook-ի մեկ այլ հատվածում, երևի մեր աչքից հեռու, կարդում եմ Հմայակ Հովհաննիսյանի մի սրտաճմլիկ հայտարարություն, որ երբ նախկին ՀՀՇ-ականները խոսում են իշխանափոխության մասին, իմ մեջ խոր կասկածներ են առաջանում, որ նրանք ուզում են գան իշխանության, որ շարունակեն իրենց թալանը։ Ես հաշիվ եմ պահանջում նրանից դրա համար։ Նա ասաց, որ ես և Վահրամ Մարտիրոսյանը իրեն զրպարտել ենք, թե ինքը «Գրիբոյեդովի» ակումբի անդամ է։ Ստիպված գործս թողեցի, համացանցում գտա «Գրիբոյեդովի» ակումբի կայքը, որը գործում է և ոչ մի հայտարարություն չկա, որ փակվել է։ Ինքն էլ իր հարցազրույցներում, երբ ինչ-որ հարցով իրեն դիմում են, ասում է՝ ինչու եք ինձ դիմում, ակումբի այլ անդամներ էլ կան։ Եվ ինչպես է նա արձագանքում. «Ասում է՝ Սերժ Սարգսյանի հանձնարարությամբ ինձ վրա դոսյե եք հավաքել և նրա պատվերով փորձում եք ինձ պախարակել։ Ու հայտարարեց, որ ես ձեզ հետ այդ փաստաթղթի տակ չեմ ստորագրի։ Սա է եղել, ես շատ կոպիտ նրան ասել եմ, թե ինքն ով է, և մեր հարաբերությունները դրանով ավարտվել են»:
Հարցազրույցն ամբողջությամբ՝ տեսանյութում: