Շակիրան երեշքաբթի հայտարարել է, որ հետաձգում է «Էլդորադո» համաշխարհային շրջագայության սկիզբը: Երգչուհին նշել է, որ նոյեմբերի 8-ին Գերմանիայում տեղի ունենալիք առաջին շոուն ժամանակավորապես չեղարկվում է բժշկական պատճառներով:
Իր ինսթագրամյան էջում նա գրել է, որ վերջին օրերին փորձերով գերլարել է ձայնալարերը, ինչի հետևանքով՝ բժիշկները խորհուրդ են տվել որոշ ժամանակով ձայնին թույլ տալ հանգստանալ՝ մեծ խնդիրներից խուսափելու համար: Շակիրան գրել է, որ տխուր է շոուն հետաձգելու անհրաժեշտության պատճառով:
«Ես շատ եմ սիրում Գերմանիայից իմ բոլոր երկրպագուներին և անհամբերությամբ սպասում եմ ձեզ իմ շոուն նվիրելու հնարավորությանը,- գրել է նա:- Ես ցավում եմ, որ պետք է լսեմ բժիշկների խորհուրդը և ժամանակը ծախսեմ վերականգնման վրա, բայց հենց հնարավոր լինի, ես նորից կսկսեմ աշխատանքը»:
Շակիրան նաև շնորհակալություն է հայտնել բոլորին աջակցության համար և գրել է, որ ինքն անում է ամեն ինչ, որ իր վիճակը լավանա, և հուսով է, որ մինչև նոյեմբերի 10-ը, երբ պետք է տեղի ունենա շոու Փարիզում, բժիշկներն իրեն թույլ կտան երգել:
