Currenttime.tv-ի թղթակցին հաջողել է այցելել ադրբեջանական փակ բնակավայր Նարդարան և զրուցել 2015 թվականի ցույցերի առաջնորդներից մեկի հետ, որոնց ժամանակ իշխանությունները կրակ են բացել ցուցարարների վրա։
Ցույցերը Նարդարանում (Բաքվից 25 կմ հյուսիս) սկսվել էին դեռևս 2002 թվականին։ Մարդիկ դժգոհել են այն բանից, որ ոչ բոլոր տներում են գազ միացրել, ինչպես նաև բողոքել այն բանից, որ կանանց արգելված է իսլամական գլխաշորեր կրելը։ Ի տարբերություն Բաքվի և Ադրբեջանի այլ շրջանների բնակիչների՝ Նարդարանում կանայք կրում են հիջաբ, ինչպես Իրանում։
2015 թվականի նոյեմբերին մարդիկ հերթական անգամ փողոց էին դուրս եկել, սակայն իշխանություններն այնտեղ էին մտցրել հատուկ ջոկատայինների և կրակ բացել ցուցարարների ուղղությամբ։ Զոհվել էր առնվազն 5 մարդ։ Բողոքական շարժման առաջնորդները ձերբակալվել էին։ Իշխանություններն այդ ժամանակ հայտարարել էին, որ իրենց հաջողվել է ահաբեկչություն կանխել, որը ծրագրվել էր գյուղում տեղակայված «Մուսուլմանական միություն» խմբավորման կողմից։
Բնակավայրի մուտքի մոտ տեղակայվել են զինված անձանցով անցակետեր, մուտքը թույլատրել են միայն տեղի բնակիչներին։ Բնակավայրը դե ֆակտո դարձել է փակ տարածք։ Այնտեղ լրագրողների մուտքն արգելվել է։
Թղթակցին հաջողվել է զրուցել Աբուլֆազ Բունյադովի հետ։ 2015 թվականին նրան վիրավորել էին, հետո՝ ձերբակալել։
Նրան ազատ են արձակել 2016 թվականի դեկտեմբերին։ Հիմա նա մասնակի կաթվածահար է և չի կարողանում քալել, քանի որ բանտի բժիշկները հրաժարվել էին նրան բուժել։ Այժմ արդեն ուշ է տղամարդուն օգնելու համար։
Նրա տան մոտ 24-ժամյա հսկողություն է սահմանված, նրա մոտ թողնում են միայն հարազատներին, վերջիններս էլ հենց ձայնագրել են թղթակցի հարցերի պատասխանները։
Հարցազրույցի ժամանակ Բունյադովն ասել է, որ ցանկանում է, որպեսզի իշխանությունները հետաքննեն 2015 թվականի դեպքերը, գտնեն նրանց, ովքեր ցուցարարների վրա կրակ բացելու հրաման են տվել, և պատժեն նրանց։
