«Բաքու-Թբիլիսի-Կարս երկաթգծի նախագիծը բավական դրական է գնահատվել տարբեր կոնսորցիումների և բեռնափոխադրողների, մասնավորապես՝ Չինաստանի, Հնդկաստանի, Պակիստանի, Ուզբեկստանի, Ղազախստանի կողմից»,- «Միջազգային և անվտանգության հարցերի հայկական ինստիտուտ»-ում կազմակերպված քննարկմանը հայտարարեց քաղաքագետ Գևորգ Մելիքյանը:
Նրա կարծիքով՝ Հայաստանի մեկուսացումը այս նախագծի ածանցյալ նպատակներից մեկն է. «Փաստացի Ադրբեջանը քայլ առ քայլ իրականացնում է այն նախագծերը, որոնք նախանշել էր 10-15 տարի առաջ»:
Ինչ վերաբերում է Հայաստանին, ապա քաղաքագետի կարծիքով՝ Հայաստանը նմանվել է անընդհատ այս կամ այն նախագիծը քննադատողի կամ հետևից փնթփնթացողի երկրի, կամ փորձում է հասկանալ, թե դիմացինը դրանից ինչ վնասներ կունենա. «Հայաստանը դիմելու է վրացական կողմին այս երկաթուղով իր ապրանքները անցկացնելու համար: Իսկ Ադրբեջանը, շատ լավ հասկանալով Հայաստանի խոցելիությունը, կարող է համաձայնել և այնուհետև նշել, որ ինքը օգնում է Հայաստանին լուծելու իր տնտեսական խնդիրները, կարող է և հակառակը՝ կտրուկ դեմ լինել»:
Քաղաքագետի խոսքով՝ այս գործընթացը հնարավորություն է տալիս իրականացնել Մետաքսի ճանապարհը, և Չինաստանը մեծ հետաքրքրություն ունի այս նախագծի հանդեպ. «Մինչդեռ Սերժ Սարգսյանը առաջատար հեռուստաալիքներից մեկին տված հարցազրույցում խոսում է հայկական գինու և կոնյակի հնության մասին»:
Գևորգ Մելիքյանը հիշեցրեց, որ ԵՄ-ն և ԱՄՆ-ը ֆինանսապես չաջակցեցին այս նախագիծը, քանի որ Հայաստանը շրջանցվում էր: «Իսկ Ռուսաստանը, լինելով Հայաստանի ռազմավարական դաշնակիցը, անգամ փորձ չարեց ճնշում գործադրել այս կամ այն մասնակցի վրա, որպեսզի Հայաստանը ևս ներգրավված լիներ»,- ասաց նա՝ ավելացնելով, սակայն, որ խնդիրը ոչ թե Ռուսաստանի, այլ Հայաստանի մեջ է:
Քաղաքագետը համոզված է՝ ոչ թե Հայաստանն է դառնում եվրասիական կամուրջ, այլ Վրաստանը:
