Արևմտյան Վրաստանում հոկտեմբերի 20-ի գիշերը տարերային աղետ է տեղի ունեցել: Վեց բալանոց փոթորկի պատճառով տուժել է Բաթումի ափամերձ տարածքը: Նախնական հաշվարկներով՝ վնասի չափը մի քանի միլիոն դոլարի է հասնում, փոխանցում է Голос России-ն:
Ամենից շատ փոթորկից տուժել է Աջարիան: Բաթումի ափամերձ զբոսայգու մի մաս ոչնչացվել է: Մի քանի տոննա ծովային ջուր է լցվել տեղական բարերը, ռեստորաններն ու սրճարանները, իսկ ալիքները սրբել-տարել են ամբողջ ներքին հարդարումը՝ աթոռներ, սեղաններ, սպասք, վնասվել են սարքավորումները:
Համեմատաբար ավելի քիչ է տուժել Փոթին: Սակայն փոթորիկն ափ է դուրս բերել 35 վագոններով բեռնված լաստանավը: Բարբախտաբար զոհեր չկան, անձնակազմի անդամները չեն տուժել: Տուժել է նավը, որին վատ եղանակային պայամանների պատճառով օգնել առայժմ հնարավոր չէ:
Վատ եղանակը խնդիրներ է ստեղծել նաև լեռնային շրջաններում, որտեղից քամին ձյունը քշել-լցրել է Աջարիայի ինքնավարության լեռնային շրջանները Վրաստանի հետ կապող մայրուղին, որով երթևեկը մինչ այժմ կաթվածահար է:
Օդերևութաբանները եղանակի բարելավում են կանխատեսում միայն հոկտեմբերի 21-ին, երբ Արևմտյան Վրաստանում ջերմաստիճանը կբարձրանա մինչև +25, անձրևները կդադարեն, ծովը համեմատաբար կհանդարտվի և հնարավոր կլինի սկսել տուժած ենթակառուցվածքների վերականգնումը: