Ռուսաստանի Պետդումայի պատգամավորների, Հանրային պալատի անդամների, իրավաբանների և վերլուծաբանների մասնակցությամբ ստեղծվել է աշխատանքային խումբ, որը մտադիր է հետխորհրդային տարածքի երկրներում ֆաշիզմի հերոսացման դրվագների հետ կապված դիմել ՄԱԿ-ի Միջազգային դատարանին: Օրերս ՌԴ Հանրային պալատի անդամ Սերգեյ Մարկովը կազմակերպել է կլոր սեղան, որտեղ ի թիվս այլ երկրների՝ նշվել է նաև Հայաստանի անունը, որտեղ պետական մակարդակով հերոսացվում է ֆաշիզմը: Սերգեյ Մարկովը Գարեգին Նժդեհին անվանել է «տեռորիստ», «ֆաշիստների հանցակից» և նշել, որ Հայաստանից պետք է հեռացնել Նժդեհի արձանը:
ԱԺ փոխնախագահ, ՀՀԿ խոսնակ Էդուարդ Շարմազանովը, անդրադառնալով խնդրին, նշեց, որ ՀՀ-ում չկա որևէ բանական մարդ, որը խրախուսի ֆաշիզմը. «ՀՀ-ն կտրականապես մերժում է ֆաշիզմը և նացիզմը: Բացի այդ, յուրաքանչյուր պետության ներքին գործն է՝ ում արձանը կտեղադրի, ում անվամբ փողոցներ կկոչի: ՀՀ-ն ինքնիշխան պետություն է, և բացառապես հայ ժողովրդի և ՀՀ-ի ներքին խնդիրն է, թե ով է իր ազգային հերոսը, և ում արձանները կտեղադրեն: Նժդեհը մեր ազգային հերոսն է, ինչպես Ալեքսանդր Նևսկին՝ ռուս ազգի ազգային հերոսը»,- ասաց Էդուարդ Շարմազանովը՝ հավելելով, որ Նժդեհին նույնացնել ֆաշիզմի հետ, նույնն է, թե Հիտլերին նույնացնել մարդասիրության հետ:
Նրա խոսքով՝ Նժդեհին փորձել ներկայացնել հակառուս, անշնորհակալ գործ է: «Նժդեհը իր հուշերում նշել է, որ հայ ցեղակրոնի միակ ճշմարիտ դաշնակիցը ռուս ժողովուրդն է»,- հավելեց նա:
Ամբողջությամբ՝ տեսանյութում: