Կատալոնիայի անկախության հռչակմանը Հայաստանը պաշտոնապես չի արձագանքել, փոխարենը` բավականին օպերատիվ են գտնվել Ստեփանակերտում և Բաքվում: Երկու մայրաքաղաքներում կատալոնական խնդիրը դրել են համեմատության մեջ ԼՂ հակամարտության հետ` սեփական դիրքորոշումները վերահաստատելու համար:
Ադրբեջանի ԱԳՆ-ն իր զորակցությունն է հայտնել Իսպանիայի տարածքային ամբողջականությանն ու ինքնիշխանությանը` հիշեցնելով, թե ինչ հետևանքների հասցրեց ղարաբաղյան «անջատողականությունը»:
Բնականաբար, միանգամայն հակառակ քաղաքական պնդումն են անում Ստեփանակերտում: ԼՂՀ ԱԳ երեկ տարածած հայտարարության մեջ մասնավորապես ասված է. «Կարևոր ենք համարում, որ Բարսելոնայի և Մադրիդի միջև քաղաքական ճգնաժամի հանգուցալուծումը գտնվի բացառապես խաղաղ միջոցներով և երկխոսության ճանապարհով: Այս կապակցությամբ անհրաժեշտ է հիշեցնել, որ հենց Ադրբեջանի հրաժարվելը՝ ճանաչել Արցախի ժողովրդի ինքնորոշման իրավունքը, և պաշտոնական Բաքվի կողմից քաղաքական հարցերի լուծման համար ուժային մեթոդների կիրառումը ադրբեջանա-ղարաբաղյան հակամարտությունը տեղափոխեցին ռազմական հարթություն»:
Իհարկե, Արցախի պաշտոնական արձագանքի մեջ որևէ հիշատակում չկա Կատալոնիայի անկախությունը ճանաչելու մտադրության մասին, սակայն ԼՂՀ ԱԳ արագ արձագանքը, կարծես թե, տեղավորվում է այն հայտարարությունների համատեքստում, որ երեկ հնչել են Աբխազիայում և Հարավային Օսեթիայում: Սուխումիում և Ցխինվալիում երեկ հայտարարել են Կատալոնիայի անկախությունը ճանաչելու պատրաստակամության մասին:
Ավելին, Հարավային Օսեթիայի արտգործնախարար Դմիտրի Մեդոևը Կատալոնիայի անկախության հռչակման օրը եղել է Բարսելոնայում, որտեղ տեղի է ունեցել Հարավային Օսեթիայի ներկայացուցչության բացումը: Ավելորդ է ասել, որ Աբխազիան և Հարավային Օսեթիան ամբողջովին կլանված են Ռուսաստանի կողմից և չեն անում որևէ քայլ, որը համաձայնեցված չէ Մոսկվայի կողմից: Պաշտոնական Մոսկվան հրապարակայնորեն չի ընդունում Կատալոնիայի անկախությունը և հայտարարել է, որ մտադիր չէ խառնվել Իսպանիայի ներքին գործերին:
Սակայն Ռուսաստանի իշխանությունները կենսականորեն շահագրգիռ են, որպեսզի կատալոնական հակամարտությունը «տաք» մնա, նույնիսկ թեժանա` լուրջ ինստիտուցիոնալ ճգնաժամ հարուցելով Եվրամիությունում: Իր կազմում մոտ հարյուր «Կատալոնիա» ունեցող Ռուսաստանին, բնականաբար, հետաքրքրում է ոչ թե կատալոնացիների անկախության ձգտումը, այլ` եվրոպական ինստիտուտների, արևմտյան դեմոկրատիայի ճգնաժամի հեռանկարը:
Պատահական չէ, որ եվրոպական մամուլը գրում է Կատալոնիայի անկախության ռուսական «հետքի» մասին: Սրանով է պայմանավորված Աբխազիայի և Հարավային Օսեթիայի պաշտոնական շրջանակների խանդավառությունը և, դժբախտաբար, միջազգային հանրության կողմից նույն համատեքստում կարող է դիտվել նաև ԼՂՀ ԱԳ երեկվա հայտարարությունը: Կատալոնիայի ինքնիշխանության միջազգային ճանաչման հեռանկարը ռեալ պոլիտիկի տեսանկյունից բացառվում է, գոնե` տեսանելի հեռանկարում:
Ակնհայտ է, որ Մոսկվայում հերթական թակարդն են լարել Արցախի համար: Հայկական դիվանագիտության խնդիրը պետք է լինի ոչ թե ռուսական սադրանքին տրվելը և Արցախին «կատալոնական մենության» փակուղի մտցնելը, այլ ԼՂ խնդրի առանձնահատկությունն ընդգծելը, որպեսզի ԼՂՀ անկախության հեռանկարը տեղավորվի համաշխարհային համատեքստի և կոնսենսուսի շրջանակներում:
