Google-ի մեկ բաժնետոմսի արժեքն ընկերության պատմության մեջ առաջին անգամ գերազանցել է 1000 դոլարը՝ հայտնում է Bloomberg գործակալությունը: Ընկերության բաժնետոմսերը թանկացել են ռեկորդային՝ 13 տոկոսով՝ հասնելով 1000.26 դոլարի:
Ընկերության արժեթղթերը, որոնք 2004-ին բորսայում առաջին տեղաբաշխման ժամանակ վաճառվել էին 85 դոլարով, ամեն տարի զգալիորեն թանկացել են, բացի 2008-ից՝ ճգնաժամի պատճառով էժանանալով 56 տոկոսով:
Ընկերության բաժնետոմսերի արժեքի կտրուկ աճը պայմանավորված է եռամսյակային հաշվետվությամբ: Երեկ հաղորդվել էր, որ ընկերության մաքուր շահույթն այս տարվա երրորդ եռամսյակի տվյալներով՝ 2012-ի նույն ժամանակահատվածի համեմատ, աճել է 36 տոկոսով՝ հասնելով 2.97 միլիարդ դոլարի, ինչը գերազանցել է շուկայի վերլուծաբանների կանխատեսումները:
Հաշվետվության հրապարակումից անմիջապես հետո ընկերության բաժնետոմսերի արժեքը Nasdaq բորսայում բարձրացել էր 8 տոկոսով՝ հասնելով 889.21 դոլարի:
Ինչպես երեկ տեղեկացրել էինք, որոնողական հսկայի եռամսյակային եկամուտը դիտարկվող ժամանակահատվածում, անցած տարվա համեմատ, աճել է 12 տոկոսով՝ հասնելով 14.89 մլրդ դոլարի: