Կատալոնիայի ղեկավար Կառլես Պուչդեմոնը պատրաստում է անկախության միակողմանի հռչակում հոկտեմբերի 23-ին: Այս մասին հայտնում է El Confidencial թերթը:
Պարբերականի տեղեկությամբ՝ առայժմ տեղեկություն չկա՝ ինչպես կհայտարարվի Իսպանիայից Կատալոնիայի անջատվելու մասին: Չի բացառվում, որ շրջանային խորհրդարանի շտապ նիստ գումարվի «ընթացիկ քաղաքական իրավիճակի վերլուծության համար»:
Կատալոնիայի իշխանություններն ուզում են անկախության մասին ավելի շուտ հայտարարել, քան Իսպանիայի Սենատը կհաստատի շրջանի ինքնավարությունը սահմանափակելու մասին կառավարության միջոցառումները:
Այսօր Իսպանիայի իշխանությունները սկսել են Կատալոնիայում ուղղակի կառավարում սահմանելու գործընթացը: Ինչպես շաբաթ օրը հայտարարել էր վարչապետ Մարիանո Ռախոյը՝ շրջանի կառավարությունը կլուծարվի, խորհրդարանական արտահերթ ընտրություններ կանցկացվեն ոչ ուշ, քան կես տարի անց: Մինչ այդ Կատալոնիան կղեկավարի Մադրիդի նշանակած ներկայացուցիչը:
Այսօր հայտնի դարձավ նաև, որ Իսպանիայի Գլխավոր դատախազության վարչությունը Կատալոնիայի կառավարության ղեկավար Կառլես Պուչդեմոնին ապստամբության մեջ մեղադրելու հիմք է պատրաստել: Հայցը կներկայացվի ինքնավարության անկախության հռչակման դեպքում: Խռովությանը մասնակցությունն ապացուցելու դեպքում պատիժը կարող է կազմել 15-30 տարվա ազատազրկում:
