Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» ՀՀ օրինագծի հանրային քննարկման ժամանակ այսօր՝ հոկտեմբերի 9-ին, միջադեպ տեղի ունեցավ:
Արդարադատության նախարարի և Մարդու իրավունքների պաշտպանի ելույթից հետո հայտարարվեց, թե այլևս ելույթներ չեն լինելու, որից հետո խառնաշփոթ ստեղծվեց: Նախագծին դեմ արտահայտվողները սկսեցին աղմկել և պահանջել ելույթի հնարավորություն:
Նրանք փորձեցին պարզաբանում ստանալ քննարկման նման ձևաչափ ընտրելու համար` խոչընդոտելով միջոցառման ընթացքը: Քննարկման մոդերատորը փորձում էր հանգստացնել նրանց` նշելով, որ ընթացքում կարող է հնարավորություն ստեղծվել նաև ելույթի համար: Նա պահանջեց, որպեսզի հանրային քննարկման ձևաչափով աշխատանքները շարունակել ցանկացողները զբաղեցնեն իրենց տեղերը, իսկ նրանք, ովքեր չեն ցանկանում, լքեն դահլիճը:
Որոշ ժամանակ լարվածությունը դահլիճում շարունակվում էր, սակայն, այնուամենայնիվ, կազմակերպիչներին հաջողվեց հանդարտեցնել կրքերը և շարունակել քննարկումը: Հայտարարվեց, որ մասնակիցները հնարավորություն կունենան 2.5-3 րոպեի շրջանակներում ներկայացնել իրենց կարծիքները և հարց տալ բանախոսներին:
