Սիրիական Իդլիբում գործողությանը թուրքական բանակի մասնակցությունը համապատասխանում է պայմանավորվածություններին, որոնք ձեռք են բերվել Ռուսաստանի և Իրանի հետ Աստանայում։ Նման հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը։
Շաբաթ օրը հանրապետության ղեկավարը հայտնել էր, որ Թուրքիայի բանակը պատրաստ է միանալու Իդլիբում Սիրիայի ազատ բանակի գործողությանը։ Թուրք առաջնորդի խոսքով՝ այդ աշխատանքը հանդիսանում է Հալեպ նահանգի տարածքում անցկացված «Եփրատի վահան» գործողության շարունակություն։
«Աստանայում Թուրքիան, Ռուսաստանն ու Իրանը մշակել են պլան։ Եվ ընդունված որոշումները մենք ներկայում կյանքի ենք կոչում Իդլիբում։ Մենք Սիրիայի ազատ բանակի հետ գործում ենք դրա ներսից, իսկ Ռուսաստանը՝ դրսից»,-ասել է Էրդողանը։
Բացի այդ, Էրդողանը հայտարարել է, որ թույլ չի տա իր երկրի սահմանների մոտ սիրիացի քրդերի ինքնապաշտպանական ուժերի (YPG) «ահաբեկչական միջանցքի» ստեղծում։
