Բոլոր այն մարդիկ, ովքեր արևմտյան արժեհամակարգի կրողներ են, անհանգստությամբ ու տագնապով են հետևում Կատալոնիայում ծավալվող իրադարձություններին, որովհետև, ի վերջո, հարվածի տակ են դրվում արժեքներ, որոնք ֆունդամենտալ են ժողովրդավարության, մարդու իրավունքների տեսանկյունից: Նժարին դրված է ոչ միայն Իսպանիայի կամ Կատալոնիայի ճակատագիրը. գլոբալ առումով փորձության են ենթարկվում արևմտյան ժողովրդավարությունը, ճգնաժամերը հաղթահարելու նրա պոտենցիալը, ռեսուրսները:
Ճիշտ հակառակը՝ ոգևորություն է նկատվում ռուսական մեդիա դաշտում, որտեղ Կատալոնիային վերաբերող լրահոսում գերակշռում են այն նյութերը, որոնցում նկարագրվում են բռնության դեպքեր: Որպես կանոն, ռուսական ԶԼՄ-ներում ուռճացված թվեր են ներկայացվում վիրավորների մասին՝ այն դեպքում, երբ, ըստ էության, բացակայում են ծանր վիրավորների պատկերող կոնկրետ լուսանկարներ, կամ չկա տեղեկատվություն այն մասին, որ Կատալոնիայի հիվանդանոցները ծանրաբեռնված են: Ռուսական ԶԼՄ-ների մասով թերևս ամեն բան պարզ է. նրանք, ըստ էության, ոչ թե լրատվական, այլ իշխանության քարոզչական գործառույթն են իրականացնում՝ նպատակ ունենալով հնարավորինս վարկաբեկել արևմտյան ժողովրդավարությունը:
Ոգևորություն է տիրում նաև Բաքվում, իհարկե՝ միանգամայն այլ են ադրբեջանական էյֆորիայի մոտիվները: Ադրբեջանի ԱԳՆ մամուլի խոսնակ Հիքմեթ Հաջիևը նշել է, որ Ադրբեջանը հարգում է Իսպանիայի տարածքային ամբողջականությունն ու ինքնիշխանությունը միջազգային ճանաչված սահմաններում:
«Ադրբեջանն իրավիճակի խաղաղ կարգավորման կողմնակիցն է Իսպանիայի Սահմանադրության և օրենքների հիման վրա»,- նշված է Ադրբեջանի ԱԳՆ հաղորդագրությունում: Ադրբեջանում ոգևորված են երկու հանգամանքով: Բանն այն է, որ Մադրիդի փաստարկները Կատալոնիայի անկախության հանրաքվեի ոչ լեգիտիմ լինելու մասին հար և նման են Բաքվի այն պնդումներին, որ Արցախը չի կարող միակողմանի նախաձեռնությամբ հանրաքվե անցկացնել և անկախություն հռչակել: Մյուս կողմից՝ Ադրբեջանում հատկապես ոգևորված են այն փաստից, որ Կատալոնիայի ժողովրդի ինքնորոշման իրավունքը զսպվում է ոչ թե քաղաքական գործիքներով, այլ բռնությամբ: Կատալոնիայում տեղի ունեցածը լեգիտիմացնում է ուժի դիրքերից ԼՂ հարցը լուծելու Ալիևի մտադրությունները:
Եվրամիությանը այս խնդիրը լրջորեն պետք է անհանգստացնի: Շատ կարևոր է, որպեսզի հնարավորինս արագ գտնվեն կատալոնական թնջուկը կարգավորելու քաղաքական լուծումներ, այլապես Իսպանիայում հոկտեմբերի 1-ին տեղի ունեցածը ոգեշնչման աղբյուր կարող է դառնալ ավտորիտար ռեժիմների համար, ովքեր բռնությունն ու ագրեսիան կարող են լայնորեն կիրառել երկրի ներսում՝ քաղաքական ընդդիմախոսների դեմ, և հակամարտություններում՝ հրահրելով արյունոտ պատերազմներ:
