Դերասանուհի, ռեժիսոր Թամար Հովհաննիսյանի անունը հրապարակված է Ժիրայր Սեֆիլյանի՝ Ազգային դիմադրության ճակատ ձևավորելու հայտարարության մեջ: Ավելին՝ նրան և Պետրոս Մակեյանին է վերապահված համակարգման աշխատանքները: «Առաջին լրատվական»-ի հետ զրույցում նշեց, որ ներկայացված ցուցակը գեստապոյից արձակված ցուցակ չէ, որ նույնությամբ մարդիկ հավաքվեն՝ առանց սեփական կարծիք հայտնելու:
«Առաջարկած անձերի մեջ կան այնպիսիք, որ ասացին՝ չենք կարող մասնակցել և չենք մասնակցի, քավ լիցի, իրենց որոշումն է, և կան մարդիկ, ովքեր վստահ են, որ կգան, կմասնակցեն մինչև վերջ: Եվ կան այնպիսիք, որ շատ-շատ հարցերում համաձայն են, բայց դեռևս կամուկացի մեջ են, թե արդյո՞ք կկարողանան, ժամանակի իմաստով, համատեղ իրենց պարտականությունները և աշխատանքներն Ազգային դիմադրության ճակատում: Չեմ կարծում, թե ինձ վրա դրված է ինչ-որ բաներ համակարգելու պարտականություն, պարզապես առաջին շրջանում այս մարդկանց համախմբելու, ի մի բերելու, պարզելու՝ ով է վստահ գալիս, ով չի գալիս, ով է ավելանում, ով է պակասում: Այս փորձնական շրջանում ես շնորհակալ եմ և զգացված նրա վստահությունից: Պետք է ասեմ, որ անակնկալի չեմ եկել, ինչ-որ չափով տեղեկացված էի»,- ասաց Թամար Հովհաննիսյանը:
Նա նշեց, որ Ժիրայր Սեֆիլյանին պատասխանել է, որ ինչ ցուցակ էլ լինի, ինչի համար էլ որ լինի, ինքը դեմ չէ, և ինքը կլինի այնտեղ, որտեղ կուզի իրեն տեսնի հրամանատար Ժիրայր Սեֆիլյանը:
Հարցին՝ Ժիրայր Սեֆիլյանը արդյո՞ք չի փորձում բանտից ընդդիմադիր առաջնորդ դառնալ, Թամար Հովհաննիսյանը նշեց. «Եվ ինչու ոչ»:
Այսօր, նրա խոսքերով, ոչ թե դեռ պատրաստ չէ ժողովուրդը համախմբման, այլ այլևս պատրաստ չէ:
Հարցազրույցն ամբողջությամբ՝ տեսանյութում:
