Բելգիայում քաղաքական ապաստան ստացած Գրիշա Վիրաբյանը դիմում էր ներկայացրել Հատուկ քննչական ծառայություն՝ ՀՀ նախագահ Սերժ Սարգսյանի նկատմամբ քրեական գործ հարուցելու և նրան պատասխանատվության ենթարկելու համար, սակայն նա որոշել է ընդառաջ գնալ դատախազության որոշ պաշտոնյաների հորդորին և հրաժարվում է դիմումից:
«Դատախազությունից բարձրաստիճան պաշտոնյաներ հանդիպեցին, ես հասկացա, որ դա հանձնարարություն է: Առաջին անգամ 10-12 տարվա մեջ նորմալ, մարդավարի իմ հետ խոսեցին, խոստացան, որ 2004-ի խոշտանգման փաստով գործը վերաբացեն, իհարկե էլի կվերաբացեն՝ ձգձգում են, որպեսզի ժամանակ շահեն, ես էլ մարդկայնորեն ընդառաջ գնացի, ասացի, որ չեմ շարունակի այդ մի ուղղությունը, բայց հիմա դատական ատյաններում ես պայքարում եմ, որպեսզի գործը վերաբացվի՝ կարճման որոշումը փոխելու համար: Ես ինքս ինձ համար ուզում եմ հասկանալ, թե ինչու չեն կատարում Եվրոպական դատարանի վճիռը»,- շեշտեց նա:
Գրիշա Վիրաբյանի ներկայացմամբ՝ 2004 թվականի ապրիլի 24-ին ինքը ծեծի էր ենթարկվել, խոշտանգվել նախկինում ոստիկանության Արարատի մարզի վարչության պետի տեղակալի պաշտոնը զբաղեցնող Աշոտ Կարապետյանի, Արտաշատի ոստիկանության քրեական հետախուզության բաժնի պետի պաշտոնը զբաղեցնող Հովիկ Մովսիսյանի, նախկինում մարզի պետավտոտեսչության պետի պաշտոնը զբաղեցնող Ավետիք Հարությունյանի կողմից։ Գ. Վիրաբյանի ներկայացմամբ՝ իր հետ կատարված այդ բռնությունների նկատմամբ արդար դատաքննություն չի իրականացվել, և նա դիմել է Եվրոպական դատարան, որն էլ իր հերթին 2012թ. վճիռ է կայացրել, որ Հայաստանում նրա նկատմամբ խախտվել են Եվրոպական կոնվենցիայի մի շարք դրույթներ, և ՀՀ-ն չի կատարել Եվրոպական դատարանի որոշման որևէ պահանջ: ՄԻԵԴ-ը վճռով կարևորել էր այն, որ խոշտանգման մասով քրեական գործ հարուցվի, գործը հարուցվել էր, այնուհետև կառճվել՝ վաղեմության ժամկետի խնդրով պայմանավորված:
«Վերջերս իմ հարցերի պատասխանները ստանալու համար կոնսուլտացիաներ էի իրականացնում բարձրաստիճան մի պաշտոնյայի հետ, որը պատասխանատու է Եվրոպայում նման կարգի գործերի համար, նա ինձ ասաց՝ տաս տարի ձգել եմ, տաս տարի էլ կձգեմ էդ գործը: Ես անուններ չեմ տա առայժմ, բայց ասողը պատասխան կտա, ես ամեն ինչ կանեմ, որպեսզի Շենգեն վիզայից իրեն կզրկեմ, առանց մտածելու, որ 10 տարի հետո ինքը ներողություն չխնդրի, իր երեխաներն են ներողություն խնդրելու և դա զայրացրեց ինձ, հիմա ես ինչքան էլ չէի ուզում, որ Եվրոպայի նախարարների կոմիտեն վարույթ բարձացներ Հայաստանի դեմ, ես հիմա փաստաբաններիս հանձնարարել եմ գրություն ուղարկել կոմիտե, որ ՀՀ իշխանությունները չեն կատարում ՄԻԵԴ պահանջները»,- ընդգծեց նա:
Գրիշա Վիրաբյանը նաև շեշտեց, որ պատասխանատվության պիտի ենթարկվի ոչ միայն Աշոտ Կարապետյանը, այլև Աղվան Հովսեփյանը և գործի հետ առնչություն ունեցող մյուս անձինք:
Մանրամասները՝ տեսանյութում: