ԱՄՆ Կոնգրեսը մեկուկեսամսյա արձակուրդից հետո վերսկսել է նիստերը: Կոնգրեսի հին կազմը շարունակելու է աշխատանքները մինչև հունվարի 3-ը, որից հետո կսկսեն պաշտոնավարել նորընտիր կոնգրեսականները: Այս մասին տեղեկացնող թուրքական Hurriyet-ը նշում է, որ այդ ընթացքում Անկարայի համար երկու շատ կարևոր հարց է շրջանառվելու Կոնգրեսի օրակարգում: Առաջինը` Անկարայում ԱՄՆ արտակարգ և լիազոր դեսպանի նշանակման համար կազմակերպվելիք քվեարկությունն է: Այդ պաշտոնին առաջադրված Ֆրանկ Ռիկիարդոնեի թեկնածությանն օգոստոսի 5-ին վետո էր դրել հանրապետական սենատոր Սեմ Բրոունբեքը, որը թեև Կոնգրեսի միջանկյալ ընտրություններում չի վերընտրվել որպես սենատոր, բայց մինչև հունվարի երեքը իրավասու է պահպանել իր վետոն, ինչը հավանական է համարվում: Հաջորդը Հայոց ցեղասպանության N 252 բանաձևն է:
Ներկայացուցիչների պալատի նախագահ տիկին Նենսի Փելոսիի նախաձեռնությամբ, այդ բանաձևը սեպտեմբերի 22-ին ընդգրկվել էր պալատի օրակարգում: Քիչ հավանական է համարվում, որ վերջին ընտրություններում Ներկայացուցիչների պալատի նախագահի աթոռը կորցրած դեմոկրատները հայկական բանաձևը առաջ մղեն: Բայց, միևնույն ժամանակ, թուրքական պարբերականը նշում է, որ բարձրաստիճան մի պաշտոնյա Hurriyet-ին ասել է. «Նենսի Փելոսին մտադիր է երկու տարի անց կրկին զբաղեցնել Ներկայացուցիչների պալատի նախագահի պաշտոնը: Այսինքն՝ հավանականություն, այնուամենայնիվ, դեռ կա»: