Իրավաբանական անձ գրացելու համար Արդարադատության նախարարություն հասնել պետք չէ: Սա շուտով իրականություն կդառնա:
Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման գործընթացները քաղաքացիները հնարավորություն կունենան իրականացնել ոչ միայն Արդարադատության նախարարության աշխատակազմի պետական ռեգիստրի գործակալությունում, այլև ցանկացած նոտարի, փաստաբանական գրասենյակի, կամ հատուկ այդպիսի գործառույթ իրականացնելու համար ստեղծված պետական ոչ առևտրային կազմակերպությունում:
Այդ կառույցները գործելու են իրավաբանական անձանց պետական ռեգիստրի գործակալության հետ կնքած համապատասխան պայմանագրի հիման վրա: Այս կարգը հաստատելու համար պետք է իրականցվեն օրենսդրական փոփոխություններ:
«Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» օրենքում կատարված փոփոխությունների հարցը ներառված է կառավարության հոկտեմբերի 10-ի նիստի օրակարգում:
Գործադիրն ակնկալում է, որ առաջարկվող օրենսդրական փոփոխությունների ընդունումը կխթանի ձեռնարկատիրական գործունեություն ծավալելու համար բարենպաստ պայմանների ստեղծմանը, տվյալ ոլորտի աշխատանքների իրականացման համապատասխանեցումը միջազգային չափանիշներին, հետևաբար նաև տվյալ ոլորտի կատարելագործմանը:
Այժմ պետական գրանցումները իրականացնում է միայն Արդարադատության նախարարության աշխատակազմի պետական ռեգիստրի գործակալությունը:
