Մարդու իրավունքների հարցերով ՄԱԿ-ի գերագույն հանձնակատար Նավի Պիլայը հանդես է եկել հօգուտ խոլերայի համաճարակից մահացած Հայիթիի բնակիչների ընտանիքներին փոխհատուցում վճարելու: Այս մասին փոխանցում է Associated Press գործակալությունը:
Պիլայը հայտնել է, որ դարձել է խոլերայի համաճարակի պատճառների հետաքննության անցկացման նախաձեռնող: Ենթադրվում է, որ խոլերան Հայիթի են տարել ՄԱԿ-ի խաղաղապահները Նեպալից, ովքեր կղզի էին եկել 2010-ի երկրաշարժից հետո: Երկիրը պատրաստ չի եղել հիվանդության դեմ պայքարին: Տարածման մեկ այլ գործոն է հանդիսացել հակասանիտարական վիճակը, որը տիրել է երկրում ուժգին երկրաշարժից հետո:
Գերագույն հանձնակատարը չի հստակեցրել, թե որտեղից կստացվեն փոխհատուցման միջոցները:
Խոլերայի համաճարակը, որն ավելի քան 800 կյանք է խլել, աննախադեպ հարված է ՄԱԿ-ի հեղինակությանը: 2013-ի փետրվարին կազմակերպությունը մերժել էր փոխհատուցման վճարման պահանջները՝ հայտարարելով, որ ցանկացած իրավական հետապնդման դեմ անձեռնմխելիություն ունի: Զոհերի հարազատները պնդում են, որ գործը քննվի ԱՄՆ դատարանում:
