Կոնգրեսի Ներկայացուցիչների պալատը երեկ ընդունել է բանաձև, որով քննադատության է ենթարկում Բարաք Օբամայի վարած քաղաքականությունը` նրան մեղադրելով ԱՄՆ-ն առանց անհրաժեշտ պատճառների Լիբիայում պատերազմի մեջ ներքաշելու մեջ: Կոնգրեսականները Օբամայից պահանջել են երկշաբաթյա ժամկետում հայտարարել այդ գործողությունների նպատակներն ու ներկայացնել անհրաժեշտ ծախսերի հաշվետվություն:
Ինչպես հաղորդում է Associated Press գործակալությունը, բանաձևի օգտին քվեարկել է 268 կոնգրեսական (223 հանրապետական և 45 դեմոկրատ), դեմ` 145: Ընդունված բանաձևն անմիջապես ենթարկվել է Սպիտակ տան քննադատությանը: «Մեր պատկերացմամբ, նախագահը գործում է գործող օրենսդրությանը համապատասխան»,- ասել է Օբամայի մամուլի ծառայության ներկայացուցիչ Ջոշ Իրնեսթը:
Կոնգրեսականները դժգոհ են այն բանից, որ Լիբիայում ռազմական գործողությունները սկսելիս ԱՄՆ նախագահն այդ հարցը չի քննարկել կոնգրեսականների հետ և չի ստացել նրանց համաձայնությունը: Դժգոհություն են արտահայտում Օբամայի կուսակիցները: Դեմոկրատ Դենիս Կուսինիչն ավելի սուր բանաձև էր ներկայացրել, որով պահանջվում էր անմիջապես դադարեցնել ԱՄՆ մասնակցությունն այդ գործողություններին: Սակայն Կուսինիչի բանաձևն արժանացավ ընդամենը 145 կոնգրեսականի աջակցությանը:
