«Առաջին լրատվական»-ի զրուցակիցն է ԱԺ Պետաիրավական հանձնաժողովի նախագահ Հրայր Թովմասյան:
– Սերժ Սարգսյանը Բարձրաստիճան պաշտոնատար անձանց էթիկայի հանձնաժողովի անդամների հետ հանդիպման ժամանակ կարևորել էր կոռուպցիայի կանխարգելման մարմնի գործունեության մասով գործուն քայլերի նախադրյալների ստեղծումը: Այդ մարմինը կարող է ազդեցություն ունենալ ընդհանուր կոռուպցիոն միջավայրի վրա: Այն արդյոք չի՞ դառնա հերթական գործիք քաղաքական ճնշումների համար:
– Ես ձեր հարցին չեմ կարող պատասխանել. կապրենք՝ կտեսնենք: Այդ մարմնի ձևավորման հիմքում դրված են այնպիսի մեխանիզմներ, որոնք պետք է նպաստեն կոռուպցիայի կանխարգելմանը, դրա բացահայտմանը: Աշխարհում կան շատ լավ օրինակներ, թե այդ համակարգերը որքան են արդյունավետ աշխատել, հակակոռուպցիոն համակարգում ինչ էական դերակատարություն են ունեցել: Բայց օրենսդրական լուծումները դեռևս բավարար չեն, որ մենք խոսենք ամեն ինչ շատ լավ լինելու, արդյունավետ լինելու մասին: Էականորեն շատ բան կախված է այդ մարմնի աշխատելաոճից, ինչպես նաև մնացած մարմինների հանդուրժողականությունից: Քանի դեռ հասարակությունը ինքը կոռուպցիայի մեջ կասկածվողին, մեղադրվողին չի ընկալում նույն կերպ, ինչպես, ասենք, գողին, մարդասպանին, կոռուպցիան չի վերանալու: Հանրային ընկալման մեջ էդ փոփոխությունը պետք է լինի, որ նա ուղղակի հանցագործ է, որ պետք է վերաբերվել այդ մարդկանց այնպես, ինչպես վերաբերվում են հանցագործներին: Եթե այ, սա չկա, մնացած մեխանիզմների արդյունավետությունը էականորեն ընկնելու է: Այստեղ մեկ քայլից բաղկացած շախմատային քայլեր չկան, որ սա անելուց հետո մատ է լինելու, ոչ: Եթե շախմատային օրինակով ասենք՝ եթե մյուս ֆիգուրները ոչինչ չանեն, ինքը չի կարող հաղթել, բոլոր մյուս ֆիգուրները անելիք ունեն: Ես կարծում եմ՝ այդ մարմինը քաղաքական գործիք չի դառնա և արդյունավետ կաշխատի:
– Նմանատիպ այլ ֆիգուրներ ևս ունենք՝ կառավարությանն առընթեր մարմին ևս կա:
– Ողջ համակարգը՝ սկսած ոստիկանությունից, դատախազությունից, դատաիրավական համակարգից, այդ դաշտում այդ ֆիգուրներն են:
– Դուք ասացիք՝ ովքեր կասկածվում են, մեղադրվում են կաշառակերության մեջ, հասարակությունը նրանց պիտի ընկալի որպես հանցագործ: Հանրային ընկալման մեջ իշխանության ներսում եղածներից շատերն են հանցագործ:
– Գոյություն ունի կոռուպցիա, գոյություն ունի կոռուպցիայի ընկալում: Այստեղ էլ մենք ունենք անելիքներ: Կան որոշ միջազգային վերլուծություններ, որոնց արդյունքներով բուն կոռուպցիան և դրա ընկալումը իրար չեն համապատասխանում. ընկալումը շատ ավելի մեծ է:
Հարցազրույցն ամբողջությամբ՝ տեսանյութում:
